എളേറ്റിൽ: എളേറ്റിൽ വട്ടോളി- പൂനൂർ റോഡിൽ മരം മില്ലിന് സമീപം റോഡരികിൽ വളർന്ന കഞ്ചാവ് ചെടി കണ്ടെത്തി. എളേറ്റിൽ വട്ടോളി ഭാഗത്ത് എക്സൈസ് സംഘം നടത്തിയ പട്രോളിംഗിനിടെയാണ് റോഡരികിൽ തഴച്ചുവളർന്ന നിലയിൽ കഞ്ചാവ് ചെടി കണ്ടെത്തിയത്. നേരത്തെ ബസ് സ്റ്റാൻ്റിന് അടുത്തുള്ള ബിൽഡിംഗിന് മുകളിൽ നിന്നും കഞ്ചാവ് ചെടി കണ്ടെത്തിയിരുന്നു.
ഏകദേശം അഞ്ചടിയോളം ഉയരമുള്ള ചെടിയാണ് കണ്ടെടുത്തത്. ലഹരിമരുന്ന് സംഘങ്ങൾ ബോധപൂർവം നട്ടുപിടിപ്പിച്ചതാണോ, അതോ വഴിപോക്കർ ഉപേക്ഷിച്ച കഞ്ചാവ് വിത്തിൽ നിന്ന് സ്വാഭാവികമായി മുളച്ചുപൊന്തിയതാണോ എന്ന കാര്യത്തിൽ എക്സൈസ് അന്വേഷണം ആരംഭിച്ചിട്ടുണ്ട്.
പ്രദേശത്ത് ലഹരി വിൽപ്പനയോ, ഉപയോഗമോ നടക്കുന്നുണ്ടോ എന്നതിനെക്കുറിച്ച് പരിശോധന ശക്തമാക്കുമെന്ന് താമരശ്ശേരി എക്സൈസ് ഉദ്യോഗസ്ഥർ അറിയിച്ചു. സംഭവത്തിൽ കേസ് രജിസ്റ്റർ ചെയ്ത് അന്വേഷണം പുരോഗമിക്കുകയാണ്.