ബംഗളൂരു: കര്ണാടക മുഖ്യമന്ത്രി സ്ഥാനം സിദ്ധരാമയ്യ രാജിവെച്ചു. ലോക്ഭവനിലെത്തി രാജിക്കത്ത് ഗവര്ണറുടെ സെക്രട്ടറിക്ക് കൈമാറി. കുടുംബപരമായ കാര്യങ്ങള്ക്കായി ഇന്ഡോറിലുള്ള കര്ണാടക ഗവര്ണര് താവര് ചന്ദ് ഗെലോട്ട് രാത്രി ബംഗളൂരുവില് തിരിച്ചെത്തും. ഇതിന് പിന്നാലെ സിദ്ധരാമയ്യയുടെ രാജി അംഗീകരിക്കും
ഇന്ന് രാവിലെ ബംഗളൂരുവിലെ ഔദ്യോഗിക വസതിയില് നടന്ന പ്രഭാതഭക്ഷണ യോഗത്തിലാണ് താന് രാജിവെക്കുന്ന കാര്യം സിദ്ധരാമയ്യ മറ്റു മന്ത്രിമാരെ അറിയിച്ചത്. സിദ്ധരാമയ്യ ഉടന്തന്നെ ഡല്ഹിയിലെത്തി പാര്ട്ടി നേതൃത്വത്തെ കാണും. സിദ്ധരാമയ്യയുടെ രാജി ഗവർണര് അംഗീകരിക്കുന്നതിന് പിന്നാലെ കോണ്ഗ്രസ് നിയമസഭാകക്ഷി യോഗം ചേര്ന്ന് ശിവകുമാറിനെ നേതാവായി തെരഞ്ഞെടുക്കും.
ഡി.കെ ശിവകുമാറിനെ മുഖ്യമന്ത്രിയാക്കാനുള്ള കോണ്ഗ്രസ് കേന്ദ്ര നേതൃത്വത്തിന്റെ ധാരണ പ്രകാരമാണ് സിദ്ധരാമയ്യ സ്ഥാനമൊഴിഞ്ഞത്. 2023 മെയ് 20നാണ് സിദ്ധരാമയ്യ മുഖ്യമന്ത്രിയായി അധികാരമേറ്റത്. ഈ മാസം സര്ക്കാര് മൂന്നു വര്ഷം പൂര്ത്തിയാക്കിയിരുന്നു.