കോഴിക്കോട്: കോഴിക്കോട് വൻ ലഹരിവേട്ട യുവതി അടക്കം മൂന്നുപേർ പിടിയിൽ. കോഴിക്കോട് ഇരിങ്ങാടം പള്ളിയിലെ സ്വകാര്യ ലോഡ്ജിൽ നിന്നാണ് ബേപ്പൂർ സ്വദേശി അമൽ കുമാർ (30), പയ്യാനക്കൽ സ്വദേശി ഷാഹുൽ ഹമീദ് (25), പേരാമ്പ്ര സ്വദേശി കാമ്യക റീജു (21) എന്നിവരെ നാർക്കോട്ടിക് സെൽ അസിസ്റ്റൻ്റ് കമ്മീഷണർ ജോൺസൺ എ.ജെയുടെ നേതൃത്വത്തിലുള്ള ഡാൻസാഫും ചേവായൂർ പോലീസും ചേർന്ന് പിടികൂടിയത്.
വിൽപ്പനയ്ക്കായി എത്തിച്ച 108.28 ഗ്രാം എംഡിഎംഎ ആണ് പ്രതികളിൽ നിന്ന് കണ്ടെടുത്തത്. പ്രതികൾ ദീർഘകാലമായി ഡാൻസാഫിന്റെ നിരീക്ഷണത്തിൽ ആയിരുന്നു. പ്രതിയായ അമൽ മുമ്പും എംഡിഎംഎ കേസിൽ ഉൾപ്പെട്ടിട്ടുള്ള ആളാണ്. അയാളുടെ പേരിൽ നിരവധി കേസുകൾ നിലവിലുണ്ട്. നഗരത്തിലെ വിവിധ ലോഡ്ജുകളിൽ താമസിച്ച് യുവാക്കൾക്ക് ലഹരി വിൽപ്പന നടത്തുന്നതാണ് അമലിന്റെ രീതി. പോലീസ് കണ്ടുപിടിക്കാതിരിക്കാൻ യുവതികളുടെ പേരിൽ റൂം എടുത്തിട്ട് താമസിക്കുന്നതാണ് പ്രതികൾ സ്ഥിരമായി ചെയ്യാറുള്ളത്.
ഡാൻസാഫ് എസ്ഐ മനോജ് എടയടത്ത്, എ എസ്ഐ അഖിലേഷ്.കെ, എസ് സിപിഒ സുനോജ്, സിപിഒമാരായ സരുൺകുമാർ, ദിനീഷ്, തൗഫീഖ്, മഷ്ഹൂർ, അതുൽ, അഭിജിത്ത്, ചേവായൂർ പോലീസ് സ്റ്റേഷൻ എസ്ഐമാരായ ഏലിയാസ് വി.കെ, ബിജു എ.വി, എ എസ്ഐമാരായ, ജമീല.ഇ, ജയശ്രീ എം.വി, സിപിഒമാരായ ശ്രുതി.പി, ഫസൽ എന്നിവരടങ്ങിയ സംഘമാണ് പ്രതികളെ പിടികൂടിയത്.