റിസര്‍വ് ബാങ്കിന്റെ പുതിയ ഗവര്‍ണറായി സഞ്ജയ് മല്‍ഹോത്രയെ നിയമിച്ചു

ന്യൂഡൽഹി: റിസർവ് ബാങ്ക് ഓഫ് ഇന്ത്യ (ആർബിഐ) യുടെ പുതിയ ഗവർണറായി റവന്യൂ സെക്രട്ടറി സഞ്ജയ് മൽഹോത്രയെ നിയമിച്ച് കേന്ദ്ര സർക്കാർ. കേന്ദ്രമന്ത്രിസഭയുടെ നിയമനക്കമ്മിറ്റിയുടേതാണ് നിയമനം. ആർബിഐ ഗവർണർ ശക്തികാന്ത ദാസിൻ്റെ കാലാവധി ഡിസംബർ 10ന് അവസാനിക്കാനിരിക്കെയാണ് തീരുമാനം.

ആർബിഐയുടെ 26-ാമത് ഗവർണറാണ് സഞ്ജയ് മൽഹോത്ര. ഡിസംബർ 12 മുതൽ മൂന്നു വർഷത്തേക്കാണ് സഞ്ജയ് മൽഹോത്ര ചുമതലയേൽക്കുക. രാജസ്ഥാൻ കേഡറിലെ 1990 ബാച്ച് ഐഎഎസ് ഉദ്യോഗസ്ഥനാണ് ഇദ്ദേഹം. രാജ്യത്തെ പണപ്പെരുപ്പം നിയന്ത്രിക്കുക, സ്ഥിരതയുള്ള സാമ്പത്തിക വളർച്ച ഉറപ്പാക്കുക എന്നീ ഇരട്ട വെല്ലുവിളികളാണ് സഞ്ജയ് മൽഹോത്രയ്ക്ക് മുന്നിലുള്ളത്.

ഐഐടി കാൻപുരിൽനിന്ന് കപ്യൂട്ടർ സയൻസിൽ എഞ്ചിനീയറിങ് ബിരുദവും യുഎസിലെ പ്രിൻസ്ടൺ യൂണിവേഴ്സിറ്റിയിൽനിന്ന് പബ്ലിക് പോളിസിയിൽ ബിരുദാനന്തര ബിരുദവും നേടിയിട്ടുള്ള സഞ്ജയ് മൽഹോത്ര കഴിഞ്ഞ 33 വർഷത്തിലധികമായ ഊർജം, ധനകാര്യം, നികുതി, ഐടി, ഖനനം തുടങ്ങിയ വകുപ്പുകളിൽ പ്രവർത്തിച്ചു വരികയായിരുന്നു. 2022 മുതൽ ധനകാര്യ മന്ത്രാലയത്തിലെ റവന്യൂ സെക്രട്ടറിയായി പ്രവർത്തിക്കുമ്പോഴാണ് റിസർവ് ബാങ്ക് തലപ്പത്തേക്കുള്ള നിയമനം.