മുക്കം: ഒരു വശത്ത് മരണത്തോട് മല്ലിടുന്ന രോഗി, മറുവശത്ത് ഉപരാഷ്ട്രപതിയുടെ വാഹനവ്യൂഹത്തിന് വഴിയൊരുക്കാൻ റോഡിൽ തടഞ്ഞിട്ട വാഹനങ്ങൾ. ജീവൻ രക്ഷിക്കാനുള്ള തിടുക്കത്തിൽ മുന്നോട്ടുപോയ ആംബുലൻസ് ഡ്രൈവർക്കെതിരെ പിന്നീട് പോലീസ് കേസെടുത്തതോടെ സംഭവം വിവാദത്തിൽ. കാരശ്ശേരി മുൻ ഗ്രാമപഞ്ചായത്ത് അംഗവും ആംബുലൻസ് ഡ്രൈവറുമായ പി.പി ഷിഹാബിനെതിരെ കോഴിക്കോട് മെഡിക്കൽ കോളേജ് പോലീസ് കേസെടുത്ത നടപടിക്കെതിരെ വ്യാപക പ്രതിഷേധമാണ് ഉയരുന്നത്. സംഭവത്തിൽ നീതി തേടി ഷിഹാബ് ആഭ്യന്തര മന്ത്രിക്കും മനുഷ്യാവകാശ കമ്മീഷനും പരാതി നൽകി.
കഴിഞ്ഞ 16നാണ് വിവാദത്തിനിടയാക്കിയ സംഭവം. കാരശ്ശേരി മുരിങ്ങംപുറായിലെ സ്വകാര്യ ക്രഷർ ജീവനക്കാരനായ കാഞ്ഞിരമുഴി സ്വദേശി ജയൻ നടുത്തൊടിക (61) ബൈക്കിൽ നിന്ന് വീണ് തലയ്ക്ക് ഗുരുതരമായി പരിക്കേറ്റതോടെയാണ് സംഭവങ്ങളുടെ തുടക്കം. അബോധാവസ്ഥയിലായ ജയനെ ആദ്യം കെഎംസിടി മെഡിക്കൽ കോളേജിലും പിന്നീട് വിദഗ്ധ ചികിത്സക്കായി കോഴിക്കോട്ടെ സ്വകാര്യ ആശുപത്രിയിലേക്കും മാറ്റുകയായിരുന്നു.
രോഗിയുമായി ആംബുലൻസ് തൊണ്ടയാട് എത്തിയപ്പോഴാണ് ഉപരാഷ്ട്രപതിയുടെ വാഹനവ്യൂഹം കടന്നുപോകുന്നതുമായി ബന്ധപ്പെട്ട് പോലീസ് വാഹനങ്ങൾ തടഞ്ഞതെന്ന് ഷിഹാബിന്റെ പരാതി. വാഹനവ്യൂഹം കടന്നുപോയിട്ടും ആംബുലൻസിന് യാത്ര തുടരാൻ അനുമതി നൽകിയില്ലെന്നും, രോഗിയുടെ ഗുരുതരാവസ്ഥയും അടിയന്തര ചികിത്സയുടെ ആവശ്യകതയും പോലീസിനെ ബോധ്യപ്പെടുത്തിയിട്ടും നടപടിയുണ്ടായില്ലെന്നും അദ്ദേഹം പറഞ്ഞു.
രോഗിയുടെ ജീവൻ അപകടത്തിലാകുമെന്ന ആശങ്കയിൽ ആംബുലൻസ് മുന്നോട്ടെടുത്തതായും ഷിഹാബ് വ്യക്തമാക്കി. എന്നാൽ സംഭവത്തിന് പിന്നാലെ ദിവസങ്ങൾ കഴിഞ്ഞപ്പോൾ കോഴിക്കോട് മെഡിക്കൽ കോളേജ് പോലീസ് സ്റ്റേഷനിൽ നിന്ന് ഷിഹാബിന് ഫോൺവിളിയെത്തി. പോലീസിന്റെ നിർദ്ദേശം അവഗണിച്ച് അശ്രദ്ധമായി വാഹനമോടിച്ചെന്നാരോപിച്ച് തനിക്കെതിരെ കേസെടുത്തെന്ന് അറിയിക്കുകയായിരുന്നുവെന്ന് അദ്ദേഹം പറഞ്ഞു.
അതേസമയം, സംഭവത്തിൽ കടുത്ത പ്രതിഷേധം ഉയർന്നിട്ടുണ്ട്. വിഐപി സുരക്ഷയും ഗതാഗത നിയന്ത്രണങ്ങളും നടപ്പാക്കുമ്പോൾ അടിയന്തര ചികിത്സക്ക് പോകുന്ന ആംബുലൻസുകൾക്ക് തടസ്സമില്ലാത്ത യാത്ര ഉറപ്പാക്കേണ്ടതില്ലേയെന്നാണ് ഉയരുന്ന ചോദ്യം. രോഗിയുടെ ജീവൻ രക്ഷിക്കാനുള്ള ശ്രമത്തിനിടെ തടസ്സങ്ങൾ നേരിട്ടെന്ന ആരോപണവും പിന്നാലെ ഡ്രൈവർക്കെതിരെ കേസെടുത്ത നടപടിയും ഗൗരവമായി പരിശോധിക്കണമെന്ന ആവശ്യവും ഉയരുന്നുണ്ട്.