ന്യൂഡല്ഹി: കേരളമടക്കം എസ്ഐആര് കഴിഞ്ഞ സംസ്ഥാനങ്ങളില് പുതിയ വോട്ടറാകാൻ അപേക്ഷിക്കുന്നവര്ക്ക് ഇനി അപേക്ഷയോടൊപ്പം 'അധിക സത്യവാങ്മൂലം' (ഡിക്ലറേഷന് ഫോം) നല്കേണ്ട. ഇന്നലെ രാത്രിയോടെ വോട്ടേഴ്സ് പോര്ട്ടലില് നിന്ന് ഡിക്ലറേഷന് ഫോം ഒഴിവാക്കി.
‘ഫോം 6’ ചട്ടപ്രകാരം ഭേദഗതി ചെയ്യാതെ കമ്മീഷൻ സ്വന്തം നിലയ്ക്ക് അതിനൊപ്പം ഡിക്ലറേഷൻ ഫോം കൂടി ഉള്പ്പെടുത്തിയതിന് എതിരെയാണ് തെരഞ്ഞെടുപ്പ് കമ്മീഷണര്മാര് വിയോജനക്കുറിപ്പെഴുതിയത്. എസ്ഐആർ അവസാനിച്ച ശേഷം പുതിയ വോട്ടറാകാൻ അപേക്ഷിക്കുന്നവർ എസ്ഐആർ നടപടികൾക്ക് വിധേയമാകണമെന്നത് ഇതോടെ ഒഴിവായി.
എസ്ഐആർ നടക്കാത്തപ്പോൾ ‘ഫോം 6’ മാത്രം മതിയെന്നാണ് വിവാദങ്ങളുടെ പശ്ചാത്തലത്തിൽ കമ്മീഷൻ വ്യക്തമാക്കിയത്. ഫലത്തില് കേരളത്തില് പുതിയ വോട്ടറാവാൻ അപേക്ഷിക്കുന്നവര് ഇനി 'ഫോം 6' മാത്രം നല്കിയാല് മതി. അതേസമയം, എസ്ഐആര് പുരോഗമിക്കുന്ന ഡല്ഹി അടക്കമുള്ള 13 സംസ്ഥാനങ്ങളില് ഡിക്ലറേഷന് ഫോം നിലവില് നല്കണം. ഇവിടെയും എസ്ഐആര് കഴിയുമ്പോള് ഡിക്ലറേഷന് ഫോം ഒഴിവാകും.