തിരുവനന്തപുരം: ഇന്ധനവില കുത്തനെ ഉയരുന്ന സാഹചര്യത്തില് ഓട്ടോറിക്ഷകളുടെ ചാര്ജ് അടിയന്തരമായി വര്ധിപ്പിക്കണമെന്ന് ഓട്ടോ തൊഴിലാളികൾ. ഓട്ടോ ചാര്ജ് സംബന്ധിച്ച സര്ക്കാരിന്റെ അശാസ്ത്രീയ ഉത്തരവ് പിൻവലിക്കാനും ഓട്ടോ തൊഴിലാളികൾ ആവശ്യപ്പെട്ടു. വിവിധ ആവശ്യങ്ങൾ ഉന്നയിച്ച് ഓള് കേരള സ്വതന്ത്ര ഓട്ടോ തൊഴിലാളി യൂണിയന്റെ നേതൃത്വത്തില് ജൂൺ 10ന് സെക്രട്ടേറിയറ്റിന് മുന്നില് മാര്ച്ചും ധര്ണയും നടത്തും. മാര്ച്ച് എച്ച്എംഎസ് സംസ്ഥാന ജനറല് സെക്രട്ടറി ടോമി മാത്യു ഉദ്ഘാടനം ചെയ്യും.
മിനിമം ചാര്ജ് 50 രൂപയായും പിന്നീടുള്ള ഓരോ കിലോ മീറ്ററിനും 25 രൂപയായും വര്ധിപ്പിക്കുക, സിഎഫ്, ക്ഷേമനിധി, അനധികൃത സര്വീസ്, പാര്ക്കിങ് സൗകര്യങ്ങള് തുടങ്ങി ഓട്ടോ തൊഴിലാളികള് നേരിടുന്ന പ്രധാനപ്പെട്ട പ്രശ്നങ്ങള് ചര്ച്ച ചെയ്ത് പരിഹരിക്കുക തുടങ്ങിയ ആവശ്യങ്ങൾ ഉന്നയിച്ചാണ് സമരമെന്ന് സംഘടനാ ഭാരവാഹികൾ വ്യക്തമാക്കി.