കൊച്ചി: ഒന്നാം ക്ലാസുകാരന്റെ സ്കൂൾ ബാഗിൽ നിന്നും കൂറ്റൻ മൂർഖൻ പാമ്പിനെ പിടികൂടി. കാക്കനാട് അത്താണി എളവക്കാട്ട് അബ്ദുൾ അസീസിന്റെ വീട്ടിൽ നിന്നാണ് പാമ്പിനെ പിടികൂടിയത്. ബാഗിന് അമിതഭാരം തോന്നി പരിശോധിച്ചപ്പോഴാണ് പാമ്പിനെ കണ്ടത്. പാമ്പ് പിടുത്ത വിദഗ്ധനെത്തി പിടികൂടി വനം വകുപ്പിന് കൈമാറി.
ഇന്നലെ വൈകിട്ട് ട്യൂഷൻ കഴിഞ്ഞെത്തിയ കുട്ടി വീട്ടിലെ ഹാളിൽ മേശക്ക് താഴെ ബാഗ് വെച്ചിരുന്നു. ഇന്ന് രാവിലെ വീട്ടുജോലിക്കാരി മുറി അടിച്ചു വാരുന്നതിനിടെ മേശക്ക് താഴെയിരുന്ന ബാഗ് എടുക്കാൻ ശ്രമിച്ചപ്പോഴാണ് ബാഗിനു നല്ല ഭാരം അനുഭവപ്പെട്ടത്. തുടർന്ന് തുറന്നു നോക്കിയപ്പോൾ പാമ്പിനെ കണ്ടതും വീട്ടിലുള്ളവർ പരിഭ്രാന്തരായി. വീട്ടുകാർ കുട്ടിയുടെ സ്കൂൾ ബാഗ് മുറ്റത്തേക്ക് വലിച്ചെറിയുകയും കുറേയധികം ചാക്കിട്ട് മൂടുകയുമായിരുന്നു.
ഉടൻ തന്നെ വനം വകുപ്പിന്റെ സ്നെയിക് റെസ്ക്യൂ ടീമിലെ വിദഗ്ധരെ വിവരം അറിയിച്ചു. സ്നെയിക് റെസ്ക്യൂ ടീം അംഗം റിൻഷാദ് സ്ഥലത്തെത്തി മൂർഖൻ പാമ്പിനെ പിടികൂടി വനം വകുപ്പിന് കൈമാറുകയായിരുന്നു. അന്തരീക്ഷം ചൂടായപ്പോൾ വീടിനകത്തെ തണുപ്പിലേക്ക് കയറിയ മൂർഖൻ പാമ്പ് ബാഗിൽ കയറിയതാകാം എന്നാണ് കരുതുന്നത്.