വടകര: വടകര പുതുപ്പണത്ത് യുവാവിന് അയൽവാസിയുടെ വെട്ടേറ്റു. കൊയിലോത്ത് വയലിൽ ബിജേഷിനാണ് വെട്ടേറ്റത്. അയൽവാസി കൊയിലോത്ത് വയലിൽ ശശിയാണ് യുവാവിനെ വെട്ടിപ്പരിക്കേൽപ്പിച്ചത്. മുൻ വൈരാഗ്യമാണ് കൃത്യത്തിന് പ്രേരിപ്പിച്ചതെന്നാണ് വിവരം.
ശനിയാഴ്ച വൈകുന്നേരം മൂന്നരയോടെയായിരുന്നു സംഭവം. പ്രതി വീട്ടിലെ കൊടുവാളുമായി എത്തിയാണ് ആക്രമിച്ചത്. കാലിന് സാരമായി പരിക്കേറ്റ യുവാവിനെ വടകര ഗവ. ജില്ലാ ആശുപത്രിയിൽ പ്രവേശിപ്പിച്ചു. വടകര പോലീസ് സ്ഥലത്തെത്തി. സംഭവത്തിൽ അന്വേഷണം ആരംഭിച്ചു.