കൊച്ചി: കേരളത്തിലും ആഗോള വിപണിയിലും റെക്കോർഡ് തകർത്ത് സ്വർണവില കുതിച്ചുകയറുന്നു. രാവിലെ 295 രൂപ മുന്നേറി ആദ്യമായി ഗ്രാമിന് വില 15,000 കടന്നു. ഉച്ചയ്ക്ക് 175 രൂപ കൂടി വർദ്ധിച്ച് 15,315 രൂപയിലെത്തി. രാവിലെയും ഉച്ചയ്ക്കുമായി 3,760 രൂപ വർദ്ധിച്ച് പവന് വില 1,22,520 രൂപയാണ്. സ്വർണ വില ചരിത്രത്തിലാദ്യമായി പവന് 1.20 ലക്ഷം രൂപ ഭേദിച്ചതും ഇന്നായിരുന്നു.
18 കാരറ്റ് സ്വർണവില ഗ്രാമിന് ഉച്ചയ്ക്ക് 140 രൂപ വർദ്ധിച്ച് 12,665 രൂപയെന്ന സർവ്വകാല റെക്കോർഡിലെത്തി. വെള്ളിവിലയിൽ മാറ്റമില്ല; ഗ്രാമിന് 380 രൂപ. രാജ്യാന്തര സ്വർണവില ഔൺസിന് ഇതാദ്യമായി 5,300 ഡോളർ കടന്നു. ഈ മുന്നേറ്റത്തിന്റെ പ്രതിഫലനമാണ് കേരളത്തിലും കാണുന്നത്. ഒരു ഘട്ടത്തിൽ 5,311.29 ഡോളർ വരെ ഉയർന്ന വില നിലവിൽ 5,287 ഡോളറിൽ ആണുള്ളത്.