ഉള്ളിയേരി: ബസ്സില് വെച്ച് യുവതിയുടെ മാല കവരാൻ ശ്രമിച്ച തമിഴ്നാട് സ്വദേശികളായ സ്ത്രീകള് പിടിയില്. തമിഴ്നാട് തിരുപ്പൂര് സ്വദേശിനികളായ ലക്ഷ്മി, ശീതള് എന്നിവരാണ് പിടിയിലായത്. കരിമ്പാപ്പൊയില് സ്വദേശിയായ യുവതിയുടെ നാലേകാല് പവന് തൂക്കം വരുന്ന മാലയായിരുന്നു പ്രതികൾ കവരാൻ ശ്രമിച്ചത്. ഇന്നലെ ഉച്ചയ്ക്ക് 12 മണിയോടെയാണ് സംഭവം.
നടുവണ്ണൂരിലേക്ക് പോവാൻ ഉള്ളിയേരി ബസ്സ് സ്റ്റാന്റിൽ നിർത്തിയിട്ട ബസ്സിലായിരുന്നു പ്രതികൾ മാല പൊട്ടിക്കാൻ ശ്രമിച്ചത്. സ്വര്ണമാല പൊട്ടിച്ചതോടെ യുവതി ബഹളം വെക്കുകയായിരുന്നു. തുടർന്ന് മറ്റു യാത്രക്കാര് പ്രതികളായ തമിഴ് സ്ത്രീകളെ തടഞ്ഞുവെച്ചു. പിന്നീട് അത്തോളി പോലീസെത്തി ഇരുവരെയും അറസ്റ്റു ചെയ്യുകയായിരുന്നു. കോടതിയില് ഹാജരാക്കിയ പ്രതികളെ റിമാന്ഡ് ചെയ്തു.