മലപ്പുറം: മലപ്പുറം ജില്ലയിലെ വിവിധ ഭാഗങ്ങളില് രാത്രിയോടെ ഭൂമിക്കടിയില് നിന്നും വലിയ ശബ്ദവും നേരിയ പ്രകമ്പനവും അനുഭവപ്പെട്ടതായി റിപ്പോര്ട്ടുകള്. മലപ്പുറത്തിന്റെ വിവിധ മേഖലകളില് ജനങ്ങള് പരിഭ്രാന്തരായി വീടുകളില് നിന്നും പുറത്തിറങ്ങി. ഭൂമിക്കടിയില് നിന്നും വലിയ സ്ഫോടനത്തിന് സമാനമായ ശബ്ദമാണ് ഉണ്ടായതെന്ന് നാട്ടുകാര് പറയുന്നു. ചൊവ്വാഴ്ച രാത്രി 10നും 10.15നും ഇടയിലാണ് സംഭവം.
വേങ്ങര, കോട്ടക്കല്, ആമപ്പാറ, ചിനക്കൽ, പുതുപ്പറമ്പ്, ചെങ്കുവെട്ടി, കോഴിച്ചെന, ഊരകം, ആട്ടിരി, മറ്റത്തൂര്, ക്ലാരി സൗത്ത്, മൂച്ചിക്കല്, സ്വാഗതമാട്, പാലത്തറ, അമ്പലവട്ടം, കൊഴൂർ, ചെറുശ്ശോല എന്നിവിടങ്ങളിലാണ് പ്രധാനമായും പ്രകമ്പനം അനുഭവപ്പെട്ടത്. ചെമ്മാട്, സി.കെ നഗർ, കാച്ചടി, ചെറുമുക്ക് ഭാഗങ്ങളിലും അനുഭവപ്പെട്ടതായി പറയുന്നു.
പലയിടങ്ങളിലും വീട്ടുപകരണങ്ങള് കുലുങ്ങുകയും പാത്രങ്ങള് നിലത്തുവീഴുകയും ചെയ്തതായും റിപ്പോര്ട്ടുകളുണ്ട്. ചില വീടുകൾക്ക് കേടുപാടുകൾ സംഭവിച്ചതായും വിവരമുണ്ട്. എന്നാല് ഔദ്യോഗികമായി ഭൂചലനം സ്ഥിരീകരിച്ചു കൊണ്ടുള്ള അറിയിപ്പുകള് നാഷണല് സെന്റര് ഫോര് സീസ്മോളജിയില് നിന്നോ സംസ്ഥാന ദുരന്തനിവാരണ അതോറിറ്റിയില് നിന്നോ ഇതുവരെ ലഭ്യമായിട്ടില്ല.