തീവ്ര വോട്ടര്‍പട്ടിക പരിഷ്‌കരണം: ബിഎല്‍ഒമാര്‍ വീട്ടിലെത്തിയാല്‍ വോട്ടര്‍മാര്‍ ചെയ്യേണ്ടത് എന്തെല്ലാം?

കോഴിക്കോട്: തീവ്ര വോട്ടര്‍പട്ടിക പരിഷ്‌കരണത്തിന് വിവരം തേടി ബിഎല്‍ഒമാര്‍ വീടുകളിലെത്തി തുടങ്ങി. ഡിസംബര്‍ 4 വരെയാണ് വിവരശേഖരണം. ഒക്ടോബര്‍ 27ന് തയ്യാറാക്കിയ ലോക്‌സഭാ, നിയമസഭാ വോട്ടര്‍ പട്ടികയില്‍ ഉള്‍പ്പെട്ട എല്ലാ വോട്ടര്‍മാര്‍ക്കും ബിഎല്‍ഒമാര്‍ രണ്ടു ഫോമുകള്‍ വീതം നല്‍കും. ബിഎല്‍ഒ ആദ്യതവണ വീട്ടിലെത്തുമ്പോള്‍ വോട്ടറെ കണ്ടില്ലെങ്കില്‍, വീണ്ടും രണ്ടുതവണ കൂടി വീട്ടിലെത്തുന്നതാണ്.

വോട്ടര്‍മാര്‍ ചെയ്യേണ്ടത്.

• ബിഎല്‍ഒ നല്‍കുന്ന ഫോം പൂരിപ്പിച്ച്‌ നല്‍കിയാല്‍ മാത്രം മതി. ഈ ഘട്ടത്തില്‍ മറ്റുരേഖകള്‍ നല്‍കേണ്ടതില്ല.

• ബിഎല്‍ഒ നല്‍കുന്ന ഫോമില്‍ പേര്, വോട്ടര്‍ തിരിച്ചറിയില്‍ കാര്‍ഡ് നമ്പര്‍, ഫോട്ടോ, ക്യൂആര്‍ കോഡ് എന്നിവ പരിശോധിക്കുക.

• ഫോമിലെ ചോദ്യങ്ങള്‍ക്ക് കൃത്യമായി ഉത്തരം നല്‍കുക.

• ആവശ്യമെങ്കില്‍ പുതിയ ഫോട്ടോ ഫോമില്‍ പതിപ്പിക്കുക.

• 2002-ലെ എസ്‌ഐആറില്‍ പങ്കെടുത്തിട്ടുണ്ടെങ്കില്‍ വിശദാംശങ്ങള്‍ നല്‍കുക. ഇല്ലെങ്കില്‍ അന്നു പങ്കെടുത്ത ബന്ധുക്കളുടെ പേരു നല്‍കാം.

• ഫോമുകള്‍ പൂരിപ്പിച്ച്‌ നല്‍കിയ ശേഷം രസീത് വാങ്ങുക.

• ഫോം ഓണ്‍ലൈനായും പൂരിപ്പാക്കാന്‍ സൗകര്യമുണ്ട്.

സഹായത്തിനും വിവരങ്ങള്‍ക്കും.

• എസ്‌ഐആര്‍ പട്ടിക പരിശോധിക്കാന്‍ www.ceo.kerala.gov.in പോര്‍ട്ടലില്‍ votter search sir 2002, electoral roll sir 2002 എന്നീ ഭാഗങ്ങള്‍ പരിശോധിക്കുക. അല്ലെങ്കില്‍ ബിഎല്‍ഒയെ ബന്ധപ്പെടാം.

• ബിഎല്‍ഒ ആരെന്ന് കണ്ടെത്താന്‍: https://voters.eci.gov.in പോര്‍ട്ടലിലെ ബൂത്ത് ലെവല്‍ ഓഫിസേഴ്‌സ് ലിസ്റ്റ് പരിശോധിച്ച്‌ വിലാസവും ഫോണ്‍ നമ്പറും കണ്ടെത്താം.

• സംശയങ്ങള്‍ പരിഹരിക്കാന്‍ കേന്ദ്ര തിരഞ്ഞെടുപ്പ് കമ്മീഷന്റെ ടോള്‍ഫ്രീ നമ്പറായ 1950-ല്‍ സേവനങ്ങള്‍ ലഭിക്കും.