കോഴിക്കോട്: കോഴിക്കോട് രാമനാട്ടുകരയിൽ സ്വകാര്യ ബസ്സുകളുടെ മത്സരയോട്ടത്തിൽ വീട്ടമ്മയ്ക്ക് ജീവൻ നഷ്ടമായി. പള്ളിക്കൽ സ്വദേശി തസ്ലീമയാണ് മരിച്ചത്. രാമനാട്ടുകര പെരുമുഖം ജംഗ്ഷനിൽ ഇന്ന് വൈകീട്ട് മൂന്ന് മണിയോടെയാണ് അപകടം. ഭർത്താവിനൊപ്പം സ്കൂട്ടറിൽ സഞ്ചരിക്കുകയായിരുന്ന തസ്ലീമ ബസ്സുകളുടെ മത്സരയോട്ടത്തിനിടെ സ്കൂട്ടറിൽ നിന്ന് റോഡിൽ തെറിച്ചു വീഴുകയായിരുന്നു.
റോഡിൽ വീണ തസ്ലീമയുടെ ശരീരത്തിൽ അതേ ബസ്സിൻ്റെ ചക്രങ്ങൾ കയറിയിറങ്ങി. കോഴിക്കോടു നിന്ന് മഞ്ചേരിയിലേക്ക് പോവുകയായിരുന്ന ടിപിഎസ്സ് ബസ്സാണ് ഇടിച്ചത്. ഈ ബസിൻ്റെ പിൻവശത്തെ ടയറാണ് ശരീരത്തിൽ കയറിയത്. ഉടൻതന്നെ പോലീസും നാട്ടുകാരും ചേർന്ന് സ്ത്രീയെ കോഴിക്കോട് മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.