താമരശ്ശേരി: അന്തരിച്ച മുൻ മുഖ്യമന്ത്രിയും മുതിർന്ന സിപിഎം നേതാവുമായ വിഎസ് അച്യുതാനന്ദനെ അധിക്ഷേപിച്ച് സമൂഹമാധ്യമങ്ങളിൽ പോസ്റ്റ് ഇട്ട താമരശ്ശേരി അടിവാരം സ്വദേശി ആബിദ് അടിവാരത്തിനെതിരെ താമരശ്ശേരി പൊലീസ് കേസ് എടുത്തു.
ഡിവൈഎഫ്ഐ പ്രവർത്തകനും അഭിഭാഷകനുമായ പി.പി സന്ദീപ് നൽകിയ പരാതിയിലാണ് പൊലീസ് നടപടി. വിദേശത്തുള്ള ആബിദ് ഫെയ്‌സ്ബുക്കിലൂടെയാണ് വിദ്വേഷ പ്രചരണം നടത്തിയത്. വ്യാജപ്രചാരണം നടത്തി സമൂഹത്തിൽ കലാപാഹ്വാനത്തിന് ശ്രമിച്ചെന്നാണ് എഫ്ഐആർ. പ്രതിഷേധങ്ങളെ തുടർന്ന് ഫെയ്സ്ബുക്കിൽ നിന്നും ഇയാൾ പോസ്റ്റ് പിൻവലിച്ചെങ്കിലും ഇതിന്റെ സ്ക്രീൻഷോട്ട് വ്യാപകമായി പ്രചരിച്ചിരുന്നു.
ഫെയ്സ്ബുക്കിൽ വിദ്വേഷ പോസ്റ്റിട്ടതിനെതിരെ ഡിവൈഎഫ്ഐ പ്രതിഷേധിച്ചു. ആബിദ് അടിവാരത്തിൻ്റെ താമരശ്ശേരിയിലെ ഫസ ഫൗണ്ടേഷൻ എന്ന സ്ഥാപനത്തിന് മുന്നിൽ പോസ്റ്ററുകൾ പതിച്ചായിരുന്നു പ്രതിഷേധം.