തിരുവനന്തപുരം: വിദ്യാർത്ഥികളുടെ കൺസഷൻ നിരക്ക് വർദ്ധപ്പിക്കുന്നത് അടക്കമുള്ള വിവിധ ആവശ്യങ്ങള് സംസ്ഥാന സർക്കാർ അംഗീകരിക്കാത്തതിനെ തുടർന്ന് സ്വകാര്യ ബസുടമകള് സമരത്തിലേക്ക്. സമരം ആരംഭിക്കുന്ന തീയതി രണ്ടു ദിവസത്തിനുള്ളില് പ്രഖ്യാപിക്കുമെന്നാണ് സൂചന. ഇതുമായി ബന്ധപ്പെട്ട് ബസുടമകള് നേരത്തെ സൂചനാ പണിമുടക്ക് നടത്തിയിരുന്നു. ബസുടമകളുടെ ആവശ്യങ്ങള് അടിസ്ഥാനമാക്കി സർക്കാർ തലത്തില് ഇനിയൊരു ചർച്ചയ്ക്കുള്ള സാധ്യത നിലനില്ക്കുന്നില്ല എന്നാണ് സൂചന.
ജൂലായ് 22 മുതല് അനിശ്ചിതകാല സമരം ആരംഭിക്കുമെന്ന് പ്രഖ്യാപിച്ചിരുന്നെങ്കിലും മുൻ മുഖ്യമന്ത്രി വി.എസ് അച്യുതാനന്ദന്റെ വിയോഗത്തെ തുടർന്ന് അത് മാറ്റി വെക്കുകയായിരുന്നു. അതിനുമുൻപ് നടന്ന മന്ത്രിതല ചർച്ചകളും ഗതാഗത സെക്രട്ടറിയുമായുള്ള ചർച്ചകളും നടന്നിരുന്നു. വിദ്യാർത്ഥി സംഘടനകളുമായി ആലോചിച്ച ശേഷം യാത്രാനിരക്ക് വർദ്ധിപ്പിക്കാമെന്ന ഗതാഗത മന്ത്രിയുമായുള്ള ചർച്ചയില് പറഞ്ഞിരുന്നു. വിദ്യാർത്ഥി സംഘടനാ പ്രതിനിധികളും ബസുടമകളും ഗതാഗത സെക്രട്ടറിയും തമ്മില് ഇന്നു നടന്ന ചർച്ച പരാജയപ്പെട്ടതിനെ തുടർന്നാണ് അനിശ്ചിതകാല സമരം എന്ന തീരുമാനത്തിലേക്ക് ബസുടമകള് എത്തിയിരിക്കുന്നത്.