തിരുവനന്തപുരം: അന്തരിച്ച മുന്‍ മുഖ്യമന്ത്രിയും മുതിര്‍ന്ന കമ്മ്യൂണിസ്റ്റ് നേതാവുമായ വി.എസ് അച്യുതാനന്ദനെ സാമൂഹ്യ മാധ്യമങ്ങളിലൂടെ അധിക്ഷേപിച്ച അധ്യാപകനെ സസ്‌പെന്‍ഡ് ചെയ്തു. ആറ്റിങ്ങല്‍ ഗവ.ബോയ്‌സ് എച്ച്എസ്എസിലെ അധ്യാപകന്‍ അനൂപ്.വിയെ ആണ് പൊതുവിദ്യാഭ്യാസ ഡയറക്ടർ സസ്‌പെന്‍ഡ് ചെയ്തത്. വിഎസിന്റെ മരണവാർത്ത പുറത്തു വന്നപ്പോൾ വാട്സാപ്പിൽ സ്റ്റാറ്റസിട്ടായിരുന്നു അധ്യാപകൻ്റെ അധിക്ഷേപം. ഇതിനെതിരെ വ്യാപക പ്രതിഷേധം ഉയർന്നതോടെ അനൂപിനെ പൊലീസ് നേരത്തെ അറസ്റ്റ് ചെയ്തിരുന്നു.
അധ്യാപകനെതിരെ വിദ്യാഭ്യാസ വകുപ്പ് മാതൃകാപരമായ നടപടി സ്വീകരിക്കണമെന്ന് ആവശ്യപ്പെട്ട് സുപ്രീംകോടതി അഭിഭാഷകനും സേവ് നിമിഷപ്രിയ ആക്ഷന്‍ കൗണ്‍സില്‍ നിയമോപദേഷ്ടാവുമായ അഡ്വ. സുഭാഷ് ചന്ദ്രന്‍ കെ.ആര്‍ ഫേസ്ബുക്കില്‍ കുറിച്ചിരുന്നു. വെറുപ്പ് മലയാളി മനസുകളെ എത്രമാത്രം കീഴ്‌പ്പെടുത്തുന്നു എന്നതിന് നിമിഷ കേസിനു ശേഷം മറ്റൊരു ഉദാഹരണമാണിത്. ഇവരാണോ നമ്മുടെ കുഞ്ഞുങ്ങള്‍ക്ക് അക്ഷരം പകര്‍ന്നു നല്‍കുന്നതെന്നും അഡ്വ.സുഭാഷ് ചന്ദ്രന്‍ കെ.ആര്‍ ചോദിച്ചിരുന്നു.