തൃശ്ശൂർ: തൃശ്ശൂർ കൂട്ടാലയിൽ വയോധികനെ കൊന്ന് ചാക്കിലാക്കി ഉപേഷിച്ച നിലയിൽ കണ്ടെത്തി. വീടിനടുത്ത പറമ്പില്‍ നിന്നാണ് മൃതദേഹം കണ്ടെത്തിയത്. കൂട്ടാല സ്വദേശി സുന്ദരൻ (73) ആണ് കൊല്ലപ്പെട്ടത്. ഇയാളുടെ ശരീരത്തിലുണ്ടായിരുന്ന സ്വര്‍ണമാലയും മോതിരവും കാണാനില്ല. സുന്ദരൻ്റെ മൂത്ത മകൻ സുമേഷിനെ പൊലീസ് കസ്റ്റഡിയിലെടുത്തു.
പുത്തൂര്‍ എന്ന സ്ഥലത്താണ് സുമേഷ് താമസിച്ചിരുന്നത്. രാവിലെ സുന്ദരൻ്റെ രണ്ടാമത്തെ മകനും കുടുംബവും പുറത്ത് പോയിരുന്നു. ആ സമയം സുമേഷ് വീട്ടിലേക്ക് വന്ന് കൊലപ്പെടുത്തി ചാക്കിൽ ഉപേക്ഷിച്ചെന്നാണ് പോലീസിൻ്റെ നിഗമനം. സുമേഷ് മദ്യപിച്ചെത്തി വഴക്ക് ഉണ്ടാക്കിയിരുന്നതായി പൊലീസ് അറിയിച്ചു. ഇന്നും ഉച്ചയോടെ തർക്കമുണ്ടായിരുന്നതായും ഉദ്യോഗസ്ഥർ വ്യക്തമാക്കി. സുമേഷിനെ പുത്തൂരിൽ നിന്നാണ് പൊലീസ് പിടികൂടിയത്.
സുന്ദരൻ്റെ മകളുടെ മക്കൾ ഇതേ വീട്ടിലായിരുന്നു താമസം. അവർ ഉച്ചയ്ക്ക് രണ്ട് മണിക്ക് വന്നപ്പോൾ വീട്ടിൽ ബ്ലഡ് കണ്ടെങ്കിലും ചായം വീണതാണെന്ന് കരുതി. പിന്നീട് മുത്തശ്ശനെ കാണാത്തതിനെ തുടര്‍ന്ന് വൈകിട്ട് 5 മണിയോടെ തെരച്ചിൽ നടത്തുകയായിരുന്നു. തൊട്ടടുത്ത കാട് പിടിച്ച പറമ്പിൽ മൃതദേഹം വലിച്ച പാട് കണ്ട് തിരഞ്ഞപ്പോഴാണ് ചാക്കിൽ പൊതിഞ്ഞ നിലയിൽ മൃതദേഹം കണ്ടെത്തിയത്. മണ്ണൂത്തി പൊലീസ് സ്ഥലത്തെത്തി ഇന്‍ക്വസ്റ്റ് അടക്കമുള്ള നടപടികള്‍ ആരംഭിച്ചു.