റിയാദ്: സൗദി അറേബ്യയിലെ ജിദ്ദയിലുണ്ടായ വാഹനാപകടത്തിൽ കൊടുവള്ളി സ്വദേശിയായ യുവാവ് മരിച്ചു. കൊടുവള്ളി ആവിലോറ കിഴക്കോത്ത് പാറക്കൽ കിഴക്കേചെവിടൻ അബ്ദുൽ മജീദ് മുസ്‌ലിയാരുടെ മകൻ മുഹമ്മദ് ബാദുഷ ഫാരിസ് (25) ആണ് മരണപ്പെട്ടത്. അപകടത്തിൽ വാഹനത്തിൻ്റെ ഡ്രൈവർ കോഴിക്കോട് പാറോപ്പടി സ്വദേശിയായ ഷൗക്കത്തലി പരിക്കുകളോടെ ആശുപത്രിയിൽ ചികിത്സയിലാണ്. ജിദ്ദയിലെ ജാമിയ ഖുവൈസിലായിരുന്നു ബാദുഷയുടെ താമസം.
ജിദ്ദയിൽ നിന്ന് ജിസാൻ ഭാഗത്തേക്ക് സ്റ്റേഷനറി സാധനങ്ങളുമായി പോയ ഡയന സെയിൽസിൻ്റെ വാഹനമാണ് അപകടത്തിൽപ്പെട്ടത്. ചൊവ്വാഴ്ച പുലർച്ചെ അലിത്തിനടുത്ത് വെച്ച് ട്രൈലറിന് പിന്നിൽ ഇടിച്ചായിരുന്നു അപകടം. ഇടിയുടെ ആഘാതത്തിൽ ഡയന വാഹനത്തിന്റെ ക്യാബിൻ പൂർണ്ണമായി തകർന്നു. നടപടിക്രമങ്ങൾ പൂർത്തീകരിച്ച ശേഷം മൃതദേഹം നാട്ടിലെത്തിക്കും. മാതാവ്: ഷറീന. സഹോദരങ്ങൾ: ആദിൽഷ, ജന്ന ഫാത്തിമ.