കുന്ദമംഗലം: കുന്ദമംഗലം താഴെപടനിലം ഉപ്പംചേരിമ്മൽ വളവിൽ സ്വകാര്യ ബസും കാറും കൂട്ടിയിടിച്ച് അപകടം. കൊടുവള്ളിയിലേക്ക് പോകുകയായിരുന്ന വെസ്റ്റേൺ എന്ന ബസും വയനാട് ഭാഗത്ത് നിന്ന് വരികയായിരുന്ന വിവാഹ പാർട്ടിക്കാർ സഞ്ചരിച്ച കിയ കാറും തമ്മിൽ കൂട്ടിയിടിച്ചായിരുന്നു അപകടം.
സംഭവത്തിൽ കാറിലുണ്ടായിരുന്ന വധുവിനടക്കം പത്തു പേർക്ക് പരിക്കേറ്റു. പരിക്കേറ്റവരെ സ്വകാര്യ ആശുപത്രിയിലും, കോഴിക്കോട് മെഡിക്കൽ കോളേജിലുമായി പ്രവേശിപ്പിച്ചു. ആരുടേയും പരിക്ക് ഗുരുതരമല്ല. അപകടത്തെ തുടർന്ന് ഏറെനേരം താഴെപടനിലം റോഡിൽ ഗതാഗതം തടസ്സം നേരിട്ടു. കുന്ദമംഗലം എസ്എച്ഒ കിരണിന്റെ നേതൃത്വത്തിലുള്ള പോലീസ് സംഘം സ്ഥലത്തെത്തി ഗതാഗതം പുനഃസ്ഥാപിച്ചു.