കൊയിലാണ്ടി: തിക്കോടിയിൽ മത്സ്യബന്ധനത്തിന് പോയ തോണി മറിഞ്ഞ് യുവാവ് മുങ്ങി മരിച്ചു. തിക്കോടി പാലക്കുളങ്ങരകുനി പുതിയവളപ്പിൽ ഷൈജു(40) ആണ് മരിച്ചത്. കൂടെയുണ്ടായിരുന്ന പുതിയവളപ്പിൽ രവി (59), തിക്കോടി പീടികവളപ്പിൽ ദേവദാസ് (59) എന്നിവരെ രക്ഷപ്പെടുത്തി. ഇന്ന് പുലർച്ചെ 5.15 ഓടെയാണ് സംഭവം.
കോടിക്കലിൽനിന്നു പോയ തോണിയാണ് കാറ്റിലും തിരയിലുംപെട്ട് മറിഞ്ഞത്. ഷൈജു വലയിൽ കുടുങ്ങിപ്പോകുകയായിരുന്നു. കുറച്ചകലെയുണ്ടായിരുന്ന മറ്റൊരു തോണിയെത്തി മൂന്നുപേരെയും കരയ്‌ക്കെത്തിക്കുകയായിരുന്നു. കൊയിലാണ്ടി താലൂക്ക് ആശുപത്രിയിൽ പ്രവേശിപ്പിച്ചെങ്കിലും ഷൈജുവിനെ രക്ഷിക്കാനായില്ല.
തോണിയും വലയും കടലിൽ ഉപേക്ഷിച്ച നിലയിലാണ്. കരയിൽ നിന്നും 16 കിലോമീറ്ററോളം അകലെയായിരുന്നു അപകടം. നിഖിലയാണ് ഷൈജുവിന്റെ ഭാര്യ. പിതാവ്: ശ്രീധരൻ, മാതാവ്: സുശീല.