കോടഞ്ചേരി: കോടഞ്ചേരി തുഷാരഗിരിയില്‍ പുലിയുടെ സാന്നിധ്യമെന്ന് സംശയം. കിന്നരിത്തോട് ബെന്നിയുടെ വീട്ടിലെ വളര്‍ത്തുനായയെ അഞ്ജാത ജീവി കടിച്ചുകൊന്ന നിലയില്‍ കണ്ടെത്തി. വനംവകുപ്പും ആര്‍ആര്‍ടി സംഘവും സ്ഥലത്തെത്തി പരിശോധന നടത്തി.
പ്രദേശത്ത് മഴയുള്ളതിനാല്‍ കാല്‍പ്പാടുകള്‍ കണ്ടെത്താന്‍ ബുദ്ധിമുട്ട് നേരിടുന്നുണ്ട്. പുലിയുടെ സാന്നിധ്യം ഉറപ്പാക്കാന്‍ പ്രദേശത്ത് ക്യാമറകള്‍ സ്ഥാപിക്കാന്‍ തീരുമാനിച്ചിട്ടുണ്ട്. കൂട് സ്ഥാപിക്കുന്നതിന് വകുപ്പുതല അനുമതിക്ക് അപേക്ഷ നല്‍കിയിട്ടുണ്ടെന്നും അധികൃതര്‍ അറിയിച്ചു.
വനത്തോട് ചേര്‍ന്നുകിടക്കുന്ന പ്രദേശമാണ് തുഷാരഗിരി. ഇതിന് മുമ്പും പ്രദേശത്ത് വന്യമൃഗങ്ങളുടെ ശല്യമുണ്ടായിരുന്നതിനാല്‍ എത്രയും പെട്ടെന്ന് കൂട് സ്ഥാപിക്കണമെന്നാണ് നാട്ടുകാരുടെ ആവശ്യം.