നരിക്കുനി: നരിക്കുനിയിൽ പട്ടാപ്പകൽ സ്റ്റേഷനറി കടയിൽ മോഷണം. പടനിലം റോഡിൽ സർവീസ് സ്റ്റേഷന് സമീപമുള്ള ‘അനു സ്റ്റേഷനറി ആൻഡ് കൂൾബാർ’ എന്ന സ്ഥാപനത്തിൽ ഇന്ന് രാവിലെയാണ് മോഷണം നടന്നത്. കടയുടമ പുറത്തേക്ക് പോയ തക്കം നോക്കി അകത്തുകയറിയ മോഷ്ടാക്കൾ മൊബൈൽ ഫോണും പണവുമടങ്ങിയ ബാഗ് കവരുകയായിരുന്നു.
സംഭവത്തിൻ്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. സ്കൂട്ടറിലെത്തിയ രണ്ടുപേരിൽ ഒരാൾ വാഹനത്തിന് സമീപം കാത്തുനിൽക്കുകയും, മറ്റൊരാൾ കടയ്ക്കുള്ളിൽ കയറി ബാഗുമായി ഇറങ്ങി രക്ഷപ്പെടുന്നതും ദൃശ്യങ്ങളിൽ വ്യക്തമാണ്. കടയുടമയുടെ പരാതിയുടെ അടിസ്ഥാനത്തിൽ കൊടുവള്ളി പോലീസ് കേസെടുത്ത് അന്വേഷണം ആരംഭിച്ചു. സിസിടിവി ദൃശ്യങ്ങൾ കേന്ദ്രീകരിച്ച് പ്രതികൾക്കായുള്ള അന്വേഷണം ഊർജിതമാക്കിയതായി പോലീസ് അറിയിച്ചു.