കോഴിക്കോട്: കൊടുംചൂടിൽ ദാഹിച്ചു വലയുന്നവരെ പിഴിഞ്ഞ് ചെറുനാരങ്ങ വില. ചൂട് തുടങ്ങുന്നത് മുമ്പ് കിലോക്ക് 50-60 രൂപയായിരുന്ന ചെറുനാരങ്ങ വില 190-210 രൂപ വരെയായി. ഒരു ചെറു നാരങ്ങയ്ക്ക് പത്ത് -പന്ത്രണ്ട് രൂപ നൽകണം. പാളയത്തെ മൊത്ത വ്യാപാര കേന്ദ്രത്തിൽ 50 കിലോയുടെ ചാക്കിന് 9259 രൂപ നൽകണം. 185 രൂപയാണ് കിലോയ്ക്ക് ഈടാക്കുന്നത്. നാരങ്ങയുടെ വലിപ്പത്തിനും നിറത്തിനുമനുസരിച്ച് വിലയിലും വ്യത്യാസമുണ്ട്.
ചൂടു കൂടിയതോടെ ചെറു നാരങ്ങയുടെ ഉപയോഗം കൂടിയതും ലഭ്യത കുറഞ്ഞതുമാണ് വിലക്കയറ്റത്തിന് കാരണമായതെന്ന് വ്യാപാരികൾ പറയുന്നു. ലെെംജ്യൂസ് തയ്യാറാക്കുന്ന പച്ച നിറത്തിലുള്ള നാരങ്ങ മൊത്ത വ്യാപാരകേന്ദ്രത്തിൽ 190 നാണ് നൽകുന്നത്. നല്ല മഞ്ഞ നിറത്തിലുള്ള വലുതിന് 200 രൂപ വരെയാകും. വില കൂടിയതോടെ കൂൾബാറുകളിലും റസ്റ്റോറന്റുകളിലുമെല്ലാം നാരങ്ങവെള്ളം, സോഡാ നാരങ്ങവെള്ളം എന്നിവയുടെ വിലയും കൂട്ടി. ചില ബേക്കറികളിൽ ഒരു ഗ്ലാസ് നാരങ്ങവെള്ളത്തിന് 25-30 രൂപവരെ വാങ്ങുന്നവരുണ്ട്.
തമിഴ്നാട്, ആന്ധ്രാപ്രദേശ് എന്നിവിടങ്ങളിൽ നിന്നാണ് സംസ്ഥാനത്തേക്ക് പ്രധാനമായും നാരങ്ങ എത്തുന്നത്. വഴിയോര ജ്യൂസ് കടകളിലും വില കൂട്ടിയിട്ടുണ്ട്. വേനൽ വരും ദിവസങ്ങളിൽ കടുക്കുമെന്നിരിക്കെ നാരങ്ങയുടെ വില ഇനിയും ഉയരുമെന്നാണ് കച്ചവടക്കാർ പറയുന്നത്. നാരങ്ങയ്ക്കൊപ്പം കക്കിരി, വിവിധ ഫലവർഗങ്ങൾക്കും വില കൂടിയിട്ടുണ്ട്.