താമരശ്ശേരി: വിദ്യാർത്ഥിനികൾക്ക് നേരെ ലൈംഗിക അതിക്രമം നടത്തിയെന്ന പരാതിയിൽ അധ്യാപകനെതിരെ കേസ്. താമരശ്ശേരി ഗവ.ഹയർ സെക്കൻ്ററി സ്കൂളിലെ അധ്യാപകൻ താമരശ്ശേരി പൂക്കോട് സ്വദേശി ഇസ്മയിലിന് എതിരെയാണ് പരാതി.
ഏതാനും ദിവസങ്ങൾക്ക് മുമ്പ് നടന്ന എൻഎസ്എസ് ക്യാമ്പിൽ വെച്ച് തങ്ങൾക്കു നേരെയുണ്ടായ ലൈഗിംക അതിക്രമം സബന്ധിച്ച വിവരം കൗൺസിലിംഗിനിടെയാണ് പെൺകുട്ടികൾ വെളിപ്പെടുത്തിയത്. അധ്യാപകൻ നിരന്തരമായി കുട്ടികളുടെ സ്വകാര്യ ഭാഗങ്ങളിൽ സ്പർശിച്ചതായും പരാതിയിൽ പറയുന്നുണ്ട്.
കഴിഞ്ഞ വർഷം സ്കൂളിൽ ചാർജെടുത്ത എൻഎസ്എഎസ് ചുമതലയുള്ള അധ്യാപകനെതിരെ പോക്സോ വകുപ്പുകൾ ചേർത്താണ് പോലീസ് കേസെടുത്തത്. അധ്യാപകൻ ഒളിവിലാണ്. എൻഎസ്എസ് ക്യാമ്പിൽ പങ്കെടുത്ത മൂന്നു കുട്ടികളാണ് കൗൺസിലിംങ്ങിനിടെ വിവരങ്ങൾ വെളിപ്പെടുത്തിയത്.
അധ്യാപകനിൽ നിന്നും സമാനമായ അനുഭവം ഉണ്ടായതായി ക്യാമ്പിൽ പങ്കെടുക്കാത്ത മറ്റൊരു കുട്ടിയും അധികൃതരെ അറിയിച്ചിട്ടുണ്ട്. മറ്റു നിരവധി കുട്ടികളും മോശം അനുഭവം ഉണ്ടായതായി പറയുന്നുണ്ട്. വരും ദിവസങ്ങളിൽ കൂടുതൽ പേർ പരാതിയുമായി എത്തുമെന്നാണ് അറിയുന്നത്.