കോഴിക്കോട്: കുവൈറ്റിൽ നിന്ന് കോഴിക്കോട്ടേക്കും കണ്ണൂരിലേക്കും എയർ ഇന്ത്യ എക്സ്പ്രസ് നേരിട്ടുള്ള വിമാന സർവീസുകൾ പുനരാരംഭിക്കും. 2026 മാര്‍ച്ച് 28 മുതൽ കോഴിക്കോട്ടേക്ക് ആഴ്ചയില്‍ അഞ്ച് ദിവസവും ഏപ്രിൽ ഒന്നു മുതൽ കണ്ണൂരിലേക്ക് ആഴ്ചയിൽ രണ്ടു ദിവസവുമാണ് സര്‍വീസ്. മദ്ധ്യവേനൽ അവധിക്കാലത്തിന് മുന്നോടിയായി മലബാർ മേഖലയിലെ ആയിരക്കണക്കിന് പ്രവാസികൾക്ക് ഈ തീരുമാനം വലിയ ആശ്വാസമാകും.
കോഴിക്കോട് നിന്ന് രാവിലെ 9.15ന് പുറപ്പെടുന്ന വിമാനം പ്രാദേശിക സമയം 11.55ന് കുവൈത്തിൽ എത്തും. കുവൈത്തിൽ നിന്നും ഉച്ചയ്ക്ക് 12.55ന് പുറപ്പെട്ട് രാത്രി 8.25ന് കരിപ്പൂരിൽ എത്തും. കണ്ണൂരിൽ നിന്ന് വൈകീട്ട് 5.40ന് പുറപ്പെടുന്ന വിമാനം കുവൈത്തിൽ രാത്രി 8.20ന് എത്തും. തിരിച്ച് 9.20ന് കുവൈത്തിൽ നിന്ന് പുറപ്പെട്ട് പുലർച്ചെ 4.50ന് കണ്ണൂരിൽ എത്തിച്ചേരും.
കഴിഞ്ഞ ഏതാനും മാസങ്ങളായി, ദുബൈ, അബുദാബി, ഷാർജ, ദോഹ, ജിദ്ദ, റിയാദ്, ബഹ്‌റൈൻ, മസ്‌കറ്റ് തുടങ്ങിയ പ്രധാന ലക്ഷ്യസ്ഥാനങ്ങളിലേക്കുള്ള സർവീസുകൾ എയര്‍ ഇന്ത്യ വെട്ടിച്ചുരുക്കിയിരുന്നു. സീസണൽ ക്രമീകരണങ്ങളുടെയും വിപുലമായ നെറ്റ്‌വർക്ക് പുനഃസംഘടനയുടെയും ഭാഗമായിരുന്നു ഈ നടപടി. ആയിരക്കണക്കിന് യാത്രക്കാരെയാണ് തീരുമാനം ദുരിതത്തിലാക്കിയത്. തുടര്‍ന്ന് പലരും കേരളത്തിന് പുറത്ത് നിന്ന് ഇരട്ടി ടിക്കറ്റ് തുക നല്‍കിയാണ് ഗള്‍ഫ് നാടുകളിലേക്ക് യാത്ര ചെയ്തിരുന്നത്.
ഗൾഫിലെ വിവിധ കേരള പ്രവാസി സംഘടനകളുടെയും കൂട്ടായ്മകളുടെയും തുടർച്ചയായ ഇടപെടലും മദ്ധ്യവേനൽ അവധി ആവശ്യകത കണക്കിലെടുത്തുമാണ് എയർ ഇന്ത്യ എക്സ്പ്രസ് ഇപ്പോള്‍ സർവീസുകൾ വീണ്ടും ആരംഭിക്കാൻ തീരുമാനിച്ചത്. വടക്കൻ-മദ്ധ്യ കേരളത്തിലെ പ്രവാസി കുടുംബങ്ങൾക്ക്, പ്രത്യേകിച്ച് ഈദുൽ ഫിത്വർ അവധിക്കാലത്തിന് ഈ തീരുമാനം വലിയ ആശ്വാസമാകും.
എയർ ഇന്ത്യ എക്സ്പ്രസിന്റെ ഔദ്യോഗിക വെബ്സൈറ്റിലും മൊബൈൽ ആപ്പിലും ബുക്കിംഗ് ആരംഭിച്ചിട്ടുണ്ട്.18,000 മുതൽ 24,000 രൂപ വരെയും റിട്ടേൺ 34,000 മുതൽ 42,000 രൂപ വരെയുമാണ് (20 കിലോ ചെക്ക്-ഇൻ ബാഗേജും 7 കിലോ ഹാൻഡ് ബാഗ് ഉൾപ്പെടെ 27 കി.ഗ്രാം) ടിക്കറ്റ് നിരക്ക് അവധിക്കാലം അടുക്കും തോറും നിരക്ക് ഉയരാൻ സാധ്യതയുണ്ട്. അതുകൊണ്ട് നേരത്തെ ബുക്ക് ചെയ്യുന്നത് ഗുണം ചെയ്യും.