കുന്ദമംഗലം: പതിമംഗലം പെട്രോൾ പമ്പിന് സമീപം ബൈക്കും പിക്കപ്പ് വാനും കൂട്ടിയിടിച്ച് ഉണ്ടായ വാഹനാപകടത്തിൽ വിദ്യാർത്ഥിനി മരിച്ചു. എകരൂൽ സ്വദേശിനി ബഫ ഫാത്തിമ (18) യാണ് മരണപ്പെട്ടത്. ഇന്ന് രാവിലെ 8.30 ഓടെയായിരുന്നു അപകടം. പ്രോവിഡൻസ് കോളേജിലെ ഡിഗ്രി വിദ്യാർത്ഥിനിയാണ് ഫാത്തിമ.
വീട്ടിൽ നിന്നും വരുമ്പോൾ കൊടുവള്ളിയിൽ വാഹനം നിർത്തിയിട്ടാണ് ബഫ സാധാരണ കോളേജിൽ പോകുന്നതെങ്കിലും ഇന്നലെയും ഇന്നും പരീക്ഷയായത് കൊണ്ട് വണ്ടിയെടുത്ത് പോകുകയായിരുന്നുവെന്ന് ബന്ധു പറയുന്നു. മാതാവ് ഇന്നലെയാണ് പിതാവ് ജോലി ചെയ്യുന്ന സൗദി അറേബ്യയിലേക്ക് പോയത്.
അപകടം സംഭവിച്ച ഉടൻ തന്നെ കോഴിക്കോട് മെഡിക്കൽ കോളേജിൽ എത്തിച്ചെങ്കിലും ജീവൻ രക്ഷിക്കാനായില്ല. പിതാവ്: ശരീഫ് (സൗദിയിലെ ദമാമിൽ ജോലി ചെയ്തുവരുന്നു). മാതാവ്: സലീഖ. സഹോദരങ്ങൾ: സഫ ശരീഫ്, നഫ ശരീഫ്.