താമരശ്ശേരി: താമരശ്ശേരിയിൽ എംഡിഎംഎയുമായി മൂന്നു യുവാക്കൾ പിടിയിൽ. കൊടുവള്ളി സ്വദേശി ഉളിയാടൻ കുന്നുമ്മൽ ഉമൈർഖാൻ, അടിവാരം നൂറാംതോട് സ്വദേശികളായ വലിയ വീട്ടിൽ ആഷിക്, മൂലക്കൽ തൊടി സൗജൽ, എന്നിവരെയാണ് വാഹന പരിശോധനക്കിടയിൽ താമരശ്ശേരി വെച്ച് സ്പെഷ്യൽ സ്ക്വാഡ് അംഗങ്ങളും താമരശ്ശേരി പോലീസും ചേർന്ന് പിടികൂടിയത്.
യുവാക്കൾ സഞ്ചരിച്ച KL 57 Y 896 നമ്പർ ബ്രസ്സ കാറിൽ നിന്നും മാരകലഹരി മരുന്നായ 3.2 ഗ്രാം എംഡിഎംഎയും ലഹരി ഉപയോഗിക്കാനുള്ള ഉപകരണങ്ങളുമാണ് പോലീസ് പിടികൂടിയത്. ഇടനിലക്കാർ മുഖേന ബാംഗ്ലൂരിൽ നിന്നാണ് ഇവർ ലഹരി മരുന്ന് എത്തിക്കുന്നത്. മുൻപ് ഗൾഫിലായിരുന്ന ഇവർ നാട്ടിൽ വന്നശേഷം ലഹരി ഉപയോഗവും പിന്നീട് വിൽപ്പനയും തുടങ്ങുകയായിരുന്നു.
കോഴിക്കോട് റൂറൽ എസ്പി കെ.ഇ ബൈജുവിൻ്റെ കീഴിലുള്ള നാർക്കോട്ടിക് സെൽ ഡിവൈഎസ്പി പ്രകാശൻ പടന്നയിലിൻ്റെ നിർദ്ദേശപ്രകാരം എസ്ഐ രാജീവ് ബാബുവിൻ്റെ നേതൃത്വത്തിലുള്ള സ്പെഷ്യൽ സ്ക്വാഡും താമരശ്ശേരി എസ്.ഐമാരായ എം.പി വിഷ്ണു, സുബിൻ ബിജു, രതീഷ്കുമാർ, എം.പി അബ്ദുൾ ഗഫൂർ എന്നിവരടങ്ങിയ സംഘവുമാണ് ഇവരെ പിടികൂടിയത്. താമരശ്ശേരി കോടതിയിൽ ഹാജരാക്കിയ മൂന്നുപേരെയും റിമാൻ്റ് ചെയ്തു.