നെടുമങ്ങാട് ഹോട്ടലിൽ ​ഗ്യാസ് സിലിണ്ടർ പൊട്ടിത്തെറിച്ച് ഉടമയ്ക്ക് ദാരുണാന്ത്യം.

തിരുവനന്തപുരം: നെടുമങ്ങാട് മാണിക്യപുരത്ത് ​ഗ്യാസ് സിലിണ്ടർ പൊട്ടിത്തെറിച്ച് മധ്യവയസ്കൻ മരിച്ചു. ഹോട്ടലിലെ ​ഗ്യാസ് അടുപ്പിൽ പാചകം ചെയ്യുന്നതിനെയാണ് പൊട്ടിത്തെറിച്ചത്. ഹോട്ടലുടമ വിജയൻ (55) ആണ് മരിച്ചത്. വെള്ളിയാഴ്ച ഉച്ചയ്ക്ക് 12 മണിയോടെയായിരുന്നു അപകടം. വിജയൻ സംഭവ സ്ഥലത്ത് വെച്ചു തന്നെ മരിച്ചു. വിജയനും ഭാര്യയുമാണ് കടയിലുണ്ടായിരുന്നത്. അപകടം നടക്കുന്നതിന് തൊട്ടു മുൻപാണ് ഭാര്യ ചെറുമകനുമായി പുറത്തേക്ക് പോയത്. 

ഗ്യാസ് ലീക്കായതാണ് അപകട കാരണമെന്നാണ് ഫയർ‌ഫോഴ്സിൻ്റെ അനുമാനം. പൊട്ടിത്തെറിയുടെ ശബ്ദം കേട്ട് നാട്ടുകാർ ഓടിയെത്തിയെങ്കിലും കട പൂർണമായി അഗ്നിക്കിരയായിരുന്നു. ഫയർഫോഴ്സെത്തി തീയണച്ചെങ്കിലും വിജയനെ രക്ഷിക്കാനായില്ല. ശരീരം പൂർണമായും കത്തിയമർന്ന നിലയിലായിരുന്നു.