താമരശ്ശേരി: താമരശ്ശേരിയില്‍ തനിച്ച് കഴിയുന്ന വയോധികയെ ആക്രമിച്ച് സ്വര്‍ണവും പണവും കവര്‍ന്നെന്ന് പരാതി. കതിരോട് ഓടര്‍പൊയില്‍ വത്സലയെയാണ് വീട്ടിലെത്തിയ മോഷ്ടാവ് ആക്രമിച്ച് ഏഴു പവന്‍ തൂക്കമുള്ള സ്വര്‍ണാഭരണങ്ങളും ഒരുലക്ഷം രൂപയും കവർന്നത്. കഴിഞ്ഞ ദിവസം രാത്രിയായിരുന്നു സംഭവം. വത്സല ശുചിമുറിയില്‍ നിന്ന് കിടപ്പുമുറിയിലേക്ക് നടന്നുവരുന്നതിനിടെ മോഷ്ടാവ് വൈദ്യുതിയുടെ മെയിന്‍സ്വിച്ച് ഓഫാക്കുകയും ഇവരുടെ മുഖത്ത് തുണി കൊണ്ട് മൂടി മോഷണം നടത്തുകയുമായിരുന്നു.
ആദ്യം ഇവര്‍ ധരിച്ചിരുന്ന, കാലിലെ പാദസ്വരമാണ് കവര്‍ന്നത്. പിന്നീട് മുറിയിലെ അലമാരയില്‍ സൂക്ഷിച്ചിരുന്ന സ്വർണാഭരണങ്ങളും പണവും മോഷ്ടിച്ച ശേഷം മോഷ്ടാവ് കടന്നുകളഞ്ഞു. 3 വള, 2 മോതിരം തുടങ്ങിയ സ്വര്‍ണാഭരണങ്ങളാണ് നഷ്ടമായത്. മോഷണം നടത്തിയശേഷം ഇയാള്‍ പിന്‍വാതില്‍ വഴിയാണ് രക്ഷപ്പെട്ടത്. സംഭവ സ്ഥലത്ത് വിരലടയാള വിദഗ്ധരും ഡോഗ് സ്‌ക്വാഡും പരിശോധന നടത്തി.