തൃശൂർ: തൃശൂർ പഴയന്നൂരിൽ പാചകവാതക സിലിണ്ടർ പൊട്ടിത്തെറിച്ച് തീ പടർന്ന് യുവതിക്കും കുഞ്ഞിനും ഗുരുതര പരിക്ക്. ചെറുകര മേപ്പാടത്തു പറമ്പിൽ സ്വദേശി തെഞ്ചിരിയിൽ വീട്ടിൽ അരുൺകുമാറിൻ്റെ ഭാര്യ സന്ധ്യയ്ക്കും മകൾ അനുശ്രീക്കുമാണ് പരിക്കേറ്റത്. ഓട്ടോ തൊഴിലാളിയായ ഭർത്താവ് അരുൺ കുമാർ സംഭവം നടക്കുമ്പോൾ വീട്ടിലുണ്ടായിരുന്നില്ല. വ്യാഴാഴ്ച രാവിലെ ആറ് മണിയോടെയാണ് സംഭവം.
അപകടത്തിൽ വലിയ ശബ്ദത്തോടെ അടുക്കളയിലെയും ഹാളിലെയും ജനൽ ചില്ലുകൾ പെട്ടിത്തെറിച്ചു. വലിയ ശബ്ദം കേട്ട് അയൽവാസികൾ ഓടിയെത്തി പരിക്കേറ്റവരെ ഉടൻ പഴയന്നൂർ കുടുംബാരോഗ്യ കേന്ദ്രത്തിൽ പ്രവേശിപ്പിച്ചു. പരിക്ക് ഗുരുതരമായതിനാൽ പിന്നീട് തൃശൂർ മെഡിക്കൽ കോളേജ് ആശുപത്രിയിലേക്ക് മാറ്റി. കുഞ്ഞിൻ്റെ അമ്മ സന്ധ്യ തീവ്രപരിചരണ വിഭാഗത്തിൽ ചികിത്സയിലാണ്.