തൃശൂർ: സ്വകാര്യ ബസ് ഉടമകൾക്ക് താക്കീതുമായി ഗതാഗതമന്ത്രി കെ.ബി ഗണേഷ് കുമാർ. പണിമുടക്കി സമരം നടത്തിയാൽ കെഎസ്ആർടിസിയെ വെച്ച് നേരിടും. രാമനിലയത്തിൽ എത്തി ബസ് ഉടമകളുമായി കൂടിക്കാഴ്ച നടത്തിയതിന് പിന്നാലെയാണ് ഗതാഗത മന്ത്രിയുടെ പ്രതികരണം. “500 ലോക്കൽ ബസുകൾ കെഎസ്ആർടിസിക്ക് ഉണ്ട്. ഡ്രൈവറെ വെച്ച് ഡീസൽ അടിച്ച് ബസ് നിരത്തിലിറക്കുമെന്ന്” ഗതാഗത വകുപ്പ് മന്ത്രി പറഞ്ഞു.
“സമരം ചെയ്യുകയാണെങ്കിൽ ഈ ബസുകൾ മുഴുവൻ റോഡിലിറങ്ങും. ശരാശരി 1200 ബസുകളാണ് എല്ലാ ദിവസവും ഇടിച്ചും മറ്റും വർക്ക്ഷോപ്പിൽ കിടന്നിരുന്നത്. എന്നാൽ ഇന്ന് അത് 450 എണ്ണമായി കുറഞ്ഞിട്ടുണ്ട്. കെഎസ്ആർടിസിക്ക് ഇപ്പോൾ വാങ്ങിയ ബസുകൾ കൂടാതെ ഇത്രയും ബസുകൾ സ്പെയർ ഉണ്ട്. അവര് സമരം ചെയ്താൽ അതിങ്ങ് ഇറക്കും.” മന്ത്രി പറഞ്ഞു.
വിദ്യാർത്ഥി കൺസഷൻ വർദ്ധിപ്പിക്കണമെന്നായിരുന്നു ബസുടമകളുടെ ആവശ്യം. അംഗീകരിച്ചില്ലെങ്കിൽ ഓണക്കാലത്ത് പണിമുടക്കും എന്ന നിലപാടിലയിരുന്നു സ്വകാര്യ ബസുടമകൾ. “ആവശ്യം അംഗീകരിക്കാൻ കഴിയാത്തതാണ്. വിദ്യാർത്ഥികളെ കൊണ്ട് സമരം ചെയ്യിപ്പിക്കാനുള്ള നീക്കമാണ് നടക്കുന്നത്. വിദ്യാർത്ഥികളെ കൊണ്ട് സമരം ചെയ്യിപ്പിച്ച് പ്രശ്നങ്ങൾ ഉണ്ടാക്കാനില്ലെന്നും” മന്ത്രി പറഞ്ഞു.
‘അവരുമായും കുട്ടികളുമായും ട്രാൻസ്പോർട്ട് സെക്രട്ടറി ചർച്ച നടത്തിയതാണ്. ആ ചർച്ചയിൽ കുട്ടികൾ സമവായത്തിന് തയ്യാറായില്ല. അതൊന്നും കാര്യമുള്ള കാര്യമല്ല. ഇവര് അഞ്ച് രൂപ വെച്ചൊക്കെ വാങ്ങുന്നുണ്ട്. കൊടുക്കുന്നുമുണ്ട്. ആദ്യം അവര് മത്സര ഓട്ടം നിർത്തട്ടെ.’