കൊല്ലം: കൊല്ലം തേവലക്കര ബോയ്‌സ് ഹൈസ്‌കൂൾ എട്ടാംക്ലാസ് വിദ്യാര്‍ത്ഥി ഷോക്കേറ്റ് മരിച്ചു. സ്‌കൂള്‍ കെട്ടിടത്തിന് മുകളില്‍ വീണ ചെരുപ്പെടുക്കാന്‍ കയറിയപ്പോഴാണ് വിദ്യാര്‍ത്ഥിക്ക് ഷോക്കേറ്റത്. മിഥുൻ (13) ആണ് മരിച്ചത്. സ്‌കൂളിന് മുകളിലൂടെ വലിച്ചിരുന്ന വൈദ്യുതലൈന്‍ അപകടാവസ്ഥയിൽ ആയിരുന്നുവെന്ന് നാട്ടുകാര്‍ ആരോപിച്ചു.
രാവിലെ കുട്ടികള്‍ പരസ്പരം ചെരുപ്പെറിഞ്ഞ് കളിക്കുന്നതിനിടെയാണ് അപകടമുണ്ടായത്. മിഥുന്റെ ചെരുപ്പ് കെട്ടിടത്തിന് മുകളില്‍ കുടുങ്ങുകയും ഇതെടുക്കാനായി കുട്ടി ഷീറ്റിലേക്ക് കയറുകയുമായിരുന്നു. സ്‌കൂള്‍ മേൽക്കൂരയോട് വളരെ ചേര്‍ന്നാണ് വൈദ്യുതലൈന്‍ പോകുന്നത്. കയറുന്നതിനിടെയില്‍ കുട്ടി അറിയാതെ ലൈനിൽ തട്ടുകയും ഷോക്കേറ്റ് ഉടനെ മരിക്കുകയുമായിരുന്നു.
എന്നാല്‍ സ്‌കൂള്‍ കെട്ടിടത്തിന് മുകളില്‍ അപകടകരമായ രീതിയില്‍ വൈദ്യുതലൈന്‍ സ്പര്‍ശിച്ചിരുന്നത് സ്കൂൾ തുറക്കുന്നതിന് മുന്‍പ് തന്നെ അധികൃതരുടെ ഉള്‍പ്പെടെ ശ്രദ്ധയില്‍പ്പെടുത്തിയിരുന്നു എന്നാണ് നാട്ടുകാര്‍ പറയുന്നത്. അപകടാവസ്ഥയിൽ കിടയ്ക്കുന്ന വൈദ്യുതലൈന്‍ മാറ്റിസ്ഥാപിക്കാത്തതിൽ വലിയ വിമര്‍ശനങ്ങളാണ് നാട്ടുകാരും രക്ഷിതാക്കളും ഉന്നയിക്കുന്നത്.