എറണാകുളം: ആലുവ കൊടികുത്തുമലയില്‍ റിയാദ് ബേക്കറിയില്‍ നിന്ന് പണം കവരുന്നതിനിടെ നിരവധി മോഷണ കേസുകളിലെ പ്രതി പിടിയില്‍. ആലങ്ങാട് വാടകയ്‌ക്ക് താമസിക്കുന്ന ഉണ്ണികുളം ഇയ്യാട് കിഴക്കേതോട്ടയില്‍ വീട്ടില്‍ ടി.വി അജയ് കുമാർ (31) ആണ് എടത്തല പൊലീസിന്റെ പിടിയിലായത്.
ബേക്കറി ഉടമ കൊടികുത്തുമല ആഞ്ഞിലിമൂട്ടില്‍ ജാസല്‍ വെള്ളിയാഴ്ച ജുമാ നമസ്കാരത്തില്‍ പങ്കെടുക്കാൻ പോയപ്പോള്‍ കടയുടെ ഷട്ടർ താഴ്‌ത്തിയിരുന്നു. എന്നാല്‍ ഷട്ടർ തുറന്ന് ഒരാള്‍ അകത്തേക്ക് കയറുന്നത് മൊബൈല്‍ ഫോണുമായി ബന്ധിപ്പിച്ച സി.സി ടി.വി ക്യാമറയിലൂടെ ജാസല്‍ കണ്ടു. തുടർന്ന് കടക്ക് സമീപത്തെ ബന്ധുക്കളെ ജാസല്‍ ഫോണ്‍ മുഖേന വിവരമറിയിച്ചാണ് പിടികൂടിയത്.
ബിനാനിപുരം പൊലീസ് സ്റ്റേഷൻ പരിധിയിലെ സൂപ്പർ മാർക്കറ്റില്‍ നിന്നും 75000 രൂപ കവർന്ന കേസിലും പ്രതിയാണ്. മാവൂർ, പൊന്നാനി, പനമരം, വഴിക്കടവ് സ്റ്റേഷനുകളിലും മോഷണക്കേസുകളുണ്ട്. പല സ്ഥലങ്ങളിലായി കുടുംബസമേതം താമസിച്ച ശേഷമാണ് മോഷണം. പ്രതിയെ ആലുവ കോടതി റിമാൻഡ് ചെയ്തു. തിങ്കളാഴ്ച കസ്റ്റഡിയിൽ വിട്ടുകിട്ടാൻ അപേക്ഷ നല്‍കും. ബിനാനിപുരം പൊലീസും പ്രതിയെ അറസ്റ്റ് ചെയ്യും.