കോഴിക്കോട്: കുപ്പിയുടെ അടപ്പ് തൊണ്ടയിൽ കുടുങ്ങി എട്ടുമാസം പ്രായമുള്ള കുഞ്ഞ് മരിച്ചു. പൊക്കുന്ന് അബീന ഹൗസിൽ നിസാറിൻ്റെ മകൻ മുഹമ്മദ് ഇബാദ് ആണ് മരിച്ചത്. ഇന്നലെ രാത്രി കുപ്പിയുടെ അടപ്പ് തൊണ്ടയിൽ കുരുങ്ങിയ നിലയിൽ കുഞ്ഞിനെ മാതാവിന്‍റെ വീട്ടിൽനിന്ന് കോഴിക്കോട് കോട്ടപ്പറമ്പ് ആശുപത്രിയിലെത്തിക്കുകയായിരുന്നു. ആശുപത്രിയിലെത്തിക്കുമ്പോൾ തന്നെ കുഞ്ഞ് മരിച്ചിരുന്നുവെന്ന് ഡോക്ടർമാർ പറയുന്നു.
ഇവരുടെ തന്നെ ആദ്യത്തെ കുട്ടി 14 ദിവസം പ്രായമുള്ളപ്പോൾ മുലപ്പാൽ തൊണ്ടയിൽ കുടുങ്ങി മരിച്ചിരുന്നു. രണ്ടാമത്തെ കുട്ടിയുടെ അപകട മരണം കൂടി ആയതോടെ സംഭവത്തിൽ സംശയമുണ്ടെന്ന പിതാവിൻ്റെ പരാതിയിൽ ടൗൺ പൊലീസ് കേസെടുത്തിട്ടുണ്ട്. കുഞ്ഞിന് അസുഖം വരുമ്പോൾ ആശുപത്രിയിൽ കൊണ്ടുപോകാൻ ഭാര്യ വീട്ടുകാർ തയാറായിരുന്നില്ലെന്ന് നിസാർ ആരോപിക്കുന്നു. കുഞ്ഞിന്‍റെ മൃതദേഹം പോസ്റ്റുമോർട്ടത്തിനായി കോഴിക്കോട് മെഡിക്കൽ കോളജിലേക്ക് മാറ്റി.