തിരുവനന്തപുരം: നാളെ മുതല്‍ സ്വകാര്യ ബസ് ഉടമകള്‍ നടത്താൻ തീരുമാനിച്ച പണിമുടക്ക് പിൻവലിച്ചു. ഗതാഗത മന്ത്രി സി.പി ജോണുമായി നടത്തിയ ചര്‍ച്ചയിലാണ് തീരുമാനം. ആവശ്യങ്ങൾ അനുഭാവപൂർവം പരിഗണിക്കുമെന്ന് മന്ത്രി വ്യക്തമാക്കി. പ്രൈവറ്റ് ബസ്സുകള്‍ സർക്കാർ ലീസിൽ എടുക്കുന്നതും ബസ്സുകളുടെ ടൈമിംഗ് കാലോചിതമായി പരിഷ്കരിക്കുന്നതടക്കമുള്ള ആവശ്യങ്ങള്‍ അംഗീകരിച്ചിട്ടുണ്ട്. അതേസമയം ബസ് ചാർജ്, കൺസഷൻ തുക എന്നിവ കൂട്ടുന്ന കാര്യത്തിൽ തീരുമാനമായിട്ടില്ല.
പ്രിയദർശിനി പദ്ധതി പ്രാബല്യത്തിൽ വന്നതോടെ സ്വകാര്യ ബസ് മേഖല കടുത്ത സാമ്പത്തിക പ്രതിസന്ധിയിലായെന്നും ബസ്സുടമകൾ കടക്കെണിയിലേക്ക് കൂപ്പുകുത്തുകയാണന്നും സമരസമിതി വ്യക്തമാക്കുന്നത്. സൗജന്യ യാത്രാ ആനുകൂല്യം സ്വകാര്യ ബസ്സുകളിലെ സ്ത്രീകൾക്കും ബാധകമാക്കണമെന്നും ഇതുമൂലമുണ്ടാകുന്ന സാമ്പത്തിക ബാധ്യത സർക്കാർ ഏറ്റെടുക്കണമെന്നുമാണ് ബസ് ഉടമകളുടെ പ്രധാന ആവശ്യം. സ്വകാര്യ ബസ് മേഖലയിലെ നഷ്ടം നികത്തുന്നതിനായി സെപ്തംബർ 2ന് സർക്കാർ നിയോഗിച്ച പ്രത്യേക കമ്മീഷൻ ചില നിർദ്ദേശങ്ങൾ സമർപ്പിച്ചിരുന്നു. എന്നാൽ ഈ നിർദ്ദേശങ്ങൾ നടപ്പിലാക്കാൻ സർക്കാർ തയ്യാറായിട്ടില്ലെന്നും ഉടമകള്‍ക്ക് പരാതിയുണ്ട്.