തിരുവമ്പാടി: തിരുവമ്പാടിയിൽ രോഗിയുമായി പോയ ആംബുലൻസ് ബൈക്കുമായി കൂട്ടിയിടിച്ച് ബൈക്ക് യാത്രികനായ യുവാവിന് ദാരുണാന്ത്യം. പുതുപ്പാടി പെരുമ്പള്ളി സ്വദേശി ചോലക്കൽ സുബൈർ (51) ആണ് അപകടത്തിൽ മരിച്ചത്. ആംബുലൻസ് ഡ്രൈവർ, ഡ്യൂട്ടിയിലുണ്ടായിരുന്ന നഴ്സ്, ആംബുലൻസിലുണ്ടായിരുന്ന രോഗി എന്നിവർക്ക് പരിക്കേറ്റു. ഇന്ന് പുലർച്ചെ നാലു മണിയോടെ തിരുവമ്പാടി-ഓമശ്ശേരി റോഡിൽ തോട്ടത്തിൽ കടവിലാണ് നാടിനെ നടുക്കിയ അപകടം.
തിരുവമ്പാടി ലിസി ആശുപത്രിയിൽ ഹൃദയാഘാതത്തെ തുടർന്ന് അടിയന്തര ചികിത്സ തേടിയെത്തിയ ആനക്കാംപൊയിൽ സ്വദേശിയെ കോഴിക്കോട് നഗരത്തിലെ സൂപ്പർ സ്പെഷ്യാലിറ്റി ആശുപത്രിയിലേക്ക് മാറ്റുന്നതിനിടെയാണ് ആംബുലൻസ് അപകടത്തിൽപ്പെട്ടത്. ബൈക്കിൽ ഇടിച്ചതിനു പിന്നാലെ നിയന്ത്രണംവിട്ട ആംബുലൻസ് പാതയോരത്തെ ഇലക്ട്രിക് പോസ്റ്റിലേക്ക് അതിശക്തമായി ഇടിച്ചുകയറുകയായിരുന്നു. ഇടിയുടെ ആഘാതത്തിൽ സുബൈർ സഞ്ചരിച്ച ബൈക്ക് പൂർണ്ണമായും തകർന്നുപോയി.
വലിയ ശബ്ദം കേട്ടെത്തിയ നാട്ടുകാരും പോലീസും ചേർന്നാണ് പരിക്കേറ്റവരെ വാഹനത്തിൽ നിന്ന് പുറത്തെടുത്ത് ഉടൻ തന്നെ മറ്റൊരു ആംബുലൻസിൽ ഓമരശ്ശേരിയിലെ സ്വകാര്യ ആശുപത്രിയിൽ എത്തിച്ചത്. സംഭവസ്ഥലത്ത് വെച്ചുതന്നെ മരിച്ച സുബൈർ ദീർഘകാലമായി തോട്ടത്തിൻകടവ് ബീഫ് സ്റ്റാളിൽ ജോലി ചെയ്തു വരികയായിരുന്നു. ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം പോസ്റ്റ്‌മോർട്ടത്തിനായി കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി.