ന്യൂഡൽഹി: യുപിഐ ഇടപാടുകൾക്ക് ഉപഭോക്താക്കളിൽ നിന്ന് ചാർജ് ഈടാക്കുമെന്ന അഭ്യൂഹങ്ങൾക്കിടെ വ്യക്തതവരുത്തി പേയ്മെന്റ് കൗൺസിൽ ഓഫ് ഇന്ത്യ. യുപിഐ സേവനങ്ങൾ ഉപഭോക്താക്കൾക്കും ചെറുകിട വ്യാപാരികൾക്കും സൗജന്യമായി തന്നെ തുടർന്നും ലഭിക്കുമെന്ന് കൗൺസിൽ വ്യക്തമാക്കി.
യുപിഐ ഉപയോഗിക്കുന്നവരുടെ എണ്ണം വലിയ തോതിൽ വർധിച്ച സാഹചര്യത്തിൽ സംവിധാനം സുസ്ഥിരമായി മുന്നോട്ട് കൊണ്ടുപോകുന്നതിനുള്ള മാർഗ്ഗങ്ങൾ സംബന്ധിച്ച് ചർച്ചകൾ നടക്കുന്നുണ്ടെന്നും കൗൺസിൽ അറിയിച്ചു. എന്നാൽ ഇതിന്റെ ഭാഗമായി ഉപഭോക്താക്കളിൽ നിന്നോ ചെറുകിട വ്യാപാരികളിൽ നിന്നോ യുപിഐ ഇടപാടുകൾക്ക് നേരിട്ട് നിരക്ക് ഈടാക്കുമെന്ന തരത്തിലുള്ള തീരുമാനം നിലവിലില്ലെന്നാണ് വ്യക്തമാക്കിയത്.
യുപിഐ ഇടപാടുകൾക്ക് മർച്ചന്റ് ഡിസ്കൗണ്ട് റേറ്റ് (MDR) ഏർപ്പെടുത്തുന്നതുമായിട്ടുള്ള ചർച്ചകൾ ഇടയ്ക്കിടെ ഉയരാറുണ്ട്. നിലവിൽ ഡിജിറ്റൽ പേയ്മെന്റുകളുടെ വ്യാപനം പ്രോത്സാഹിപ്പിക്കുന്നതിനായി ഉപഭോക്താക്കൾക്ക് സൗജന്യ ഇടപാട് സൗകര്യം തുടരുകയാണ്.
യുപിഐ ഉപയോഗം രാജ്യത്ത് റെക്കോർഡ് തലങ്ങളിലേക്ക് ഉയരുന്നതിനിടെ, സംവിധാനത്തിന്റെ ദീർഘകാല സാമ്പത്തിക സുസ്ഥിരത ഉറപ്പാക്കാനുള്ള നടപടികളാണ് ചർച്ച ചെയ്യുന്നത്. അതേസമയം, സാധാരണ ഉപഭോക്താക്കൾക്ക് യുപിഐ സേവനങ്ങൾ സൗജന്യമായി തന്നെ തുടരുമെന്ന് പേയ്മെന്റ് കൗൺസിൽ വ്യക്തമാക്കി.