കോഴിക്കോട്: ഭൂമി തരംമാറ്റുന്നതിന് കൈക്കൂലി വാങ്ങുന്നതിനിടെ ഒളവണ്ണയിൽ വില്ലേജ് ഓഫീസർ പിടിയിൽ. എറണാകുളം കോതമംഗലം സ്വദേശി ഉല്ലാസ് മോനാണ് ശനിയാഴ്ച വിജിലൻസിൻ്റെ പിടിയിലായത്. ആവശ്യപ്പെട്ട എട്ടു ലക്ഷത്തിൻ്റെ ആദ്യഘഡുവായ അമ്പതിനായിരം രൂപ കൈമാറുന്നതിനിടെയാണ് ഇയാൾ പിടിയിലായത്. മൂന്ന് ദിവസം മുമ്പാണ് പരാതിക്കാരൻ വിജിലൻസിനെ സമീപിച്ചത്.
1.62 ഏക്കർ ഭൂമി തരം മാറ്റുന്നതിനാണ് ഒളവണ്ണയിലെ വില്ലേജ് ഓഫീസറായ ഉല്ലാസ് മോൻ പരാതിക്കാരനോട് കൈക്കൂലി ആവശ്യപ്പെട്ടത്. ഒരു സെൻ്റിന് പതിനായിരം രൂപ തോതിൽ 16 ലക്ഷം രൂപയായിരുന്നു ആദ്യം ഇയാൾ കൈക്കൂലി ആവശ്യപ്പെട്ടത്. എന്നാൽ പിന്നീട് പരാതിക്കാരൻ ഇയാളുമായി നേരിൽകണ്ട് സംസാരിച്ച് എട്ടു ലക്ഷത്തിൽ ഉറപ്പിക്കുകയായിരുന്നു.
ഇതിൻ്റെ ആദ്യ ഘഡു എൻജിഒ ക്വാർട്ടേഴ്സിന് സമീപം വച്ച് കൈമാറാൻ പരാതിക്കാരനോട് ഇയാൾ ആവശ്യപ്പെട്ട പ്രകാരം എത്തിയതായിരുന്നു. ഇതിനിടെയാണ് വിജിലൻസിൻ്റെ പിടിയിലായത്. നേരത്തെയും വിജിലൻസിന്റെ സംശയനിഴലിൽ ഉണ്ടായിരുന്ന ഉദ്യോഗസ്ഥനായിരുന്നു ഇയാൾ. ഇയാൾക്കെതിരെ നടപടികൾ പുരോഗമിച്ചുവരികയാണെന്നും വിജിലൻസ് ഉദ്യോഗസ്ഥർ പറഞ്ഞു.