ബംഗളുരു: ഇന്ത്യൻ ബഹിരാകാശ ഗവേഷണ കേന്ദ്രത്തിൽ (ഐ.എസ്.ആർ.ഒ) വിവിധ തസ്തികകളിലേക്ക് അപേക്ഷ ക്ഷണിച്ചു. സയന്റിസ്റ്റ് / എൻജിനീയർ, റേഡിയോഗ്രാഫർ, സയന്റിഫിക് അസിസ്റ്റന്റ്, ടെക്നിഷ്യൻ, ലൈബ്രറി അസിസ്റ്റന്റ് തുടങ്ങി നൂറിലേറെ തസ്തികകളിലേക്കാണ് അപേക്ഷ ക്ഷണിച്ചിരിക്കുന്നത്. അപേക്ഷകർക്ക് 2025 നവംബർ 14 വരെ അപേക്ഷിക്കാം. isro.gov.in, shar.gov.in എന്നീ ഔദ്യോഗിക വെബ്സൈറ്റുകൾ വഴിയാണ് അപേക്ഷ നൽകേണ്ടത്. തിരഞ്ഞെടുക്കുന്നവർക്ക് ആന്ധ്രപ്രദേശിലെ ശ്രീഹരിക്കോട്ടയിൽ സ്ഥിതിചെയ്യുന്ന സതീഷ് ധവാൻ സ്പേസ് സെന്ററിൽ ജോലി ലഭിക്കും.
2025 ഒക്ടോബർ 16ന് ആണ് വിജ്ഞാപനം പുറത്തിറങ്ങിയത്. സമീപകാലത്തെ ഐ.എസ്.ആർ.ഒയുടെ ഏറ്റവും സമഗ്രമായ റിക്രൂട്ട്മെന്റ് റൗണ്ടുകളിൽ ഒന്നാണിത്. സയന്റിസ്റ്റ്/എൻജിനീയർ തസ്തികകൾക്ക് 56,000-രൂപ മുതൽ 1,77,500-രൂപ വരെയാണ് ശമ്പളം. ടെക്നിഷ്യൻ, ഡ്രാഫ്റ്റ്സ്മാൻ, നഴ്സ്, ലൈബ്രറി അസിസ്റ്റന്റ് എന്നീ തസ്തികകളിൽ 21,700-രൂപ മുതൽ 69,100-രൂപ വരെ ശമ്പളം ലഭിക്കും. സംവരണം കൂടി പരിഗണിച്ചായിരിക്കും നിയമനം. അപേക്ഷിക്കാനുള്ള കുറഞ്ഞ പ്രായപരിധി 18 വയസ്സും കൂടിയത് 35 വയസ്സുമാണ്.
അപേക്ഷകർ 750 രൂപ പ്രോസസിംഗ് ഫീസ് അടയ്ക്കണം. സ്ത്രീകൾ, എസ്.സി/എസ്,ടി/പി.ഡബ്ല്യുബിഡി ഉദ്യോഗാർത്ഥികൾ, മുൻ സൈനികൾ എന്നിവർക്ക് ഈ ഫീസ് പൂർണമായി തിരികെ നൽകും. മറ്റ് അപേക്ഷകർക്ക് 500 രൂപയും പരീക്ഷയ്ക്ക് ശേഷം തിരികെ നൽകും. എഴുത്തുപരീക്ഷയുടെയും അഭിമുഖത്തിന്റെയും അടിസ്ഥാനത്തിലായിരിക്കും സയന്റിസ്റ്റ്/എഞ്ചിനീയർ തസ്തികകളിലേക്കുള്ള നിയമനം. ടെക്നിക്കൽ അസിസ്റ്റന്റ്/സയന്റിഫിക് അസിസ്റ്റന്റ്/ലൈബ്രറി അസിസ്റ്റന്റ് 'എ'/ടെക്നീഷ്യൻ-ബി/ഡ്രാഫ്റ്റ്സ്മാൻ-ബി തസ്തികകളിലേക്കുള്ള അഭിമുഖത്തിന് പകരമായി സ്കിൽ ടെസ്റ്റ് നടത്തും.
സയന്റിസ്റ്റ്/എഞ്ചിനീയർമാരുടെ 'എസ്‌സി' തസ്തികയിൽ 23 ഒഴിവുകളും, ടെക്നിക്കൽ അസിസ്റ്റന്റ് തസ്തികയിൽ 28 ഒഴിവുകളും, സയന്റിഫിക് അസിസ്റ്റന്റ് തസ്തികയിൽ 3 ഒഴിവുകളുമുണ്ട്. ടെക്നീഷ്യൻ 'ബി' 70 തസ്തികകളും, ഫയർമാൻമാരുടെ 6 തസ്തികകളും, പാചകക്കാരുടെ 3 തസ്തികകളും, ഡ്രൈവർമാരുടെ 3 തസ്തികകളും, റേഡിയോഗ്രാഫറുടെ 1 തസ്തികയും ഇതിൽ ഉൾപ്പെടുന്നു. ഐടിഐ ട്രേഡുകൾ, നഴ്‌സിംഗ്, അല്ലെങ്കിൽ സപ്പോർട്ട് സർവീസുകൾ എന്നിവയിൽ പരിശീലനം നേടിയവർക്ക്, ഇന്ത്യയുടെ ബഹിരാകാശ പരിപാടിയുടെ ഭാഗമാകാവുന്ന വിധത്തിലാണ് പുതിയ വിജ്ഞാപനം. BE/B.Tech, എഞ്ചിനീയറിംങ്, നഴ്സിങിൽ ഡിപ്ലോമ, BSc, SSLC/SSC ഉള്ള ITI, 10-ാം ക്ലാസ് എന്നിവയാണ് വിവിധ തസ്തികയിലേക്കുള്ള യോഗ്യതകൾ.