കൊടുവള്ളി: വർഷങ്ങൾക്ക് മുമ്പ് കാണാതായ എളേറ്റിൽ ചളിക്കോട് സ്വദേശിയായ യുവാവിനെ കണ്ടെത്തി. ചളിക്കോട് സ്വദേശി മുഹമ്മദ് റിയാസിനെയായിരുന്നു മൂന്നു വർഷം മുമ്പ് കാണാതായത്. കാണാതായി ഒരു വർഷം കഴിഞ്ഞതിന് ശേഷമായിരുന്നു ബന്ധുക്കൾ പോലീസിൽ പരാതി നൽകിയത്. നീണ്ട അന്വേഷണങ്ങൾക്ക് ഒടുവിൽ യുവാവിനെ തമിഴ്നാട്ടിലെ ഒരു ഉൾഗ്രാമത്തിൽ നിന്നുമാണ് കൊടുവള്ളി പോലീസ് കണ്ടെത്തിയത്.
2023-ൽ കേസ് രജിസ്റ്റർ ചെയ്ത് കൊടുവള്ളി പോലീസ് അന്വേഷണം നടത്തി വരികയായിരുന്നു. തമിഴ്നാട്ടിലെ തിരുവള്ളൂർ ജില്ലയിലുള്ള മണവാൾ നഗർ പോലീസ് സ്റ്റേഷൻ പരിധിയിലെ പാമ്പരമ്പാക്കം എന്ന സ്ഥലത്ത് നിന്നും കൊടുവള്ളി പോലീസ് സ്റ്റേഷൻ ഇൻസ്പെക്ടർ സുജിത്ത്.എസ് ൻ്റെ നേതൃത്വത്തിൽ സബ് ഇൻസ്പെക്ടർ ബേബി മാത്യു, സിവിൽ പോലീസ് ഓഫീസർ ശ്രീനിഷ് എന്നിവരുൾപ്പെട്ട അന്വേഷണ സംഘമാണ് മുഹമ്മദ് റിയാസിനെ കണ്ടെത്തിയത്.