മുക്കം: അടുക്കളയിൽ കളിക്കുന്നതിനിടയിൽ അബദ്ധത്തിൽ സ്റ്റീൽ പാത്രം തലയിൽ കുടുങ്ങിയ പെൺകുഞ്ഞിനെ മുക്കം അഗ്നിരക്ഷാ സേന രക്ഷപ്പെടുത്തി. ഇന്ന് രാവിലെ 9.30 ഓടെയാണ് സംഭവം. അടിവാരം സ്വദേശിയായ കൂളമടത്ത് പുളിക്കൽ ജംഷീദിന്റെ രണ്ടര വയസ്സുകാരി മകൾ അസാ സഹറയുടെ തലയിലാണ് സ്റ്റീൽ പാത്രം കുടുങ്ങിയത്. പുറത്തെടുക്കാൻ സാധിക്കാതെ വന്നതോടെ മുക്കം ഫയർഫോഴ്സിന്റെ സഹായം തേടി വീട്ടുകാർ അഗ്നിരക്ഷാ നിലയത്തിലേക്ക് കുഞ്ഞുമായി എത്തുകയായിരുന്നു.
സ്റ്റേഷൻ ഓഫീസർ എം.അബ്ദുൽ ഗഫൂറിന്റെ നേതൃത്വത്തിലുള്ള സേനാംഗങ്ങൾ ഷിയേഴ്സ്, കട്ടർ എന്നിവ ഉപയോഗിച്ച് സൂക്ഷ്മമായി പാത്രം മുറിച്ചുമാറ്റി കുട്ടിയുടെ തല പുറത്തെടുക്കുകയായിരുന്നു. കുഞ്ഞിന് യാതൊരു പരിക്കുമേൽക്കാതെ രക്ഷപ്പെടുത്താനായത് കുഞ്ഞിനും രക്ഷിതാക്കൾക്കും ആശ്വാസമായി. സീനിയർ ഓഫീസർ എൻ.രാജേഷ്, സേനാംഗങ്ങളായ പി.ടി ശ്രീജേഷ്, എം.സി സജിത്ത് ലാൽ, എ.എസ് പ്രദീപ്‌, വി. സലീം, പി. നിയാസ്, വൈ.പി ഷറഫുദ്ധീൻ എന്നിവർ ചേർന്നാണ് പാത്രം മുറിച്ചുമാറ്റി രക്ഷാപ്രവർത്തനം നടത്തിയത്.