കോഴിക്കോട്: എല്ലാ റെക്കോർഡുകളും മറികടന്ന് സ്വര്‍ണ വില ലക്ഷത്തിന് അരികെ. സ്വര്‍ണ വില ഇന്ന് പവന് 2,840 രൂപകൂടി 97,360 രൂപയായി. ഗ്രാമിന് 355 രൂപ വര്‍ദ്ധിച്ച് 12,170 രൂപയുമായി. ഇതോടെ രണ്ടാഴ്ചക്കിടെ പവന്റെ വിലയിലുണ്ടായ വര്‍ദ്ധന 10,800 രൂപയായി.
അന്താരാഷ്ട്ര വിപണിയില്‍ സ്വര്‍ണ വില എക്കാലത്തെയും ഉയർച്ച രേഖപ്പെടുത്തി മുന്നേറുകയാണ്. ട്രോയ് ഔണ്‍സിന് 4,300 ഡോളര്‍ പിന്നിട്ടു. രാജ്യത്തെ കമ്മോഡിറ്റി വിപണിയായ എംസിഎക്‌സില്‍ പത്ത് ഗ്രാം 24 കാരറ്റിന്റെ വില 1,31,920 രൂപയായി.
യുഎസ്-ചൈന വ്യാപാര സംഘര്‍ഷം രൂക്ഷമായതും ഫെഡ് റിസര്‍വ് ബാങ്ക് നിരക്ക് കുറച്ചേക്കുമെന്ന സൂചനയുമാണ് നിലവിലെ കുതിപ്പിന് പിന്നില്‍. ഭൗമരാഷ്ട്രീയ സംഘര്‍ഷങ്ങളും ആഗോള അനിശ്ചിതത്വങ്ങളുമൊക്കെ സ്വര്‍ണത്തിന്റെ നേട്ടത്തിന് പിന്നിലുണ്ട്. വന്‍കിട നിക്ഷേപകര്‍ വന്‍തോതില്‍ സ്വര്‍ണത്തിലേക്ക് തിരിയുന്ന സാഹചര്യമാണ് ആഗോള തലത്തിലുള്ളത്.