തിരുവനന്തപുരം: പൊതുവിദ്യാലയങ്ങളിൽ ഈ അധ്യയന വർഷത്തെ ഓണപരീക്ഷ സെപ്‌തംബർ 3ന് തുടങ്ങി 12ന് അവസാനിക്കും. ഹൈസ്കൂൾ പരീക്ഷകളാണ്‌ മൂന്നിന്‌ ആരംഭിക്കുക. യുപി, ഹയർ സെക്കൻഡറി രണ്ടാംവർഷ വിദ്യാർത്ഥികൾക്ക്‌ 4 നും എൽപി വിഭാഗത്തിന്‌ 6 നും പരീക്ഷ തുടങ്ങും. ഹയർ സെക്കൻഡറി ഒന്നാം വർഷ വിദ്യാർത്ഥികൾക്ക്‌ ഓണപ്പരീക്ഷ ഉണ്ടാകില്ല.
രണ്ട്‌ മണിക്കൂറാണ്‌ പരീക്ഷാ സമയം. പരീക്ഷാ ദിവസങ്ങളിൽ രാവിലെ 10 മുതൽ 10.15 വരെയും പകൽ 1.30 മുതൽ 1.45 വരെയും കൂൾ ഓഫ്‌ ടൈം അനുവദിക്കും. വെള്ളിയാഴ്ച ഉച്ചക്കുള്ള പരീക്ഷ രണ്ട്‌ മുതൽ വൈകിട്ട്‌ 4.15 വരെയാണ്‌. ഒന്ന്‌, രണ്ട്‌ ക്ലാസുകളിൽ സമയദൈർഘ്യമില്ല. 13ന് ഓണാവധിക്കായി സ്കൂൾ അടയ്‌ക്കും. 23ന് തുറക്കും. ഏതെങ്കിലും കാരണവശാല്‍ പരീക്ഷദിവസങ്ങളില്‍ സർക്കാർ അവധി പ്രഖ്യാപിച്ചാല്‍ അന്നത്തെ പരീക്ഷ 13ന് നടത്തണമെന്നും പൊതുവിദ്യാഭ്യാസ വകുപ്പ് അറിയിച്ചു.
