തിരുവനന്തപുരം: സംസ്ഥാനത്ത് കാലാവസ്ഥ മോശമായി തുടരുന്ന സാഹചര്യത്തില് കേരളാതീരത്ത് മത്സ്യബന്ധനത്തിന് വിലക്ക്. ഇനിയൊരു അറിയിപ്പുണ്ടാകും വരെ മത്സ്യബന്ധനം പാടില്ലെന്നാണ് മുന്നറിയിപ്പ്. മത്സ്യത്തൊഴിലാളികള് ജാഗ്രത പാലിക്കണമെന്നും പ്രത്യേക നിര്ദ്ദേശം. വരും ദിവസങ്ങളിലും ശക്തമായ കാറ്റും മോശം കാലാവസ്ഥയും പ്രതീക്ഷിക്കുന്നതിനാൽ മുന്നറിയിപ്പ് കർശനമായി പാലിക്കാനും നിര്ദ്ദേശമുണ്ട്.
കേരളത്തിൽ ഇന്നുമുതല് ശക്തമായ മഴയ്ക്ക് സാധ്യതയുണ്ടെന്ന് നേരത്തെ തന്നെ കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. മലപ്പുറം, വയനാട് ജില്ലകളില് ഇന്നും ഓറഞ്ച് അലര്ട്ടാണ്. തിരുവനന്തപുരം, കൊല്ലം, പത്തനംതിട്ട, ഇടുക്കി, പാലക്കാട്, കോഴിക്കോട്, കണ്ണൂര്, കാസര്കോട് ജില്ലകളില് യെല്ലോ അലര്ട്ടും പ്രഖ്യാപിച്ചതാണ്.
