തിരുവനന്തപുരം: പ്ലസ്ടു സേ പരീക്ഷ ജൂണ് 12 മുതല് 20 വരെ നടക്കുമെന്ന് മന്ത്രി വി ശിവന്കുട്ടി അറിയിച്ചു. ഇതിന്റെ നോട്ടിഫിക്കേഷന് ഇന്നുതന്നെ ഇറങ്ങും. സേ പരീക്ഷക്ക് അപേക്ഷിക്കാനുള്ള അവസാന തീയതി മെയ്13. പുനര്മൂല്യനിര്ണയം, സൂക്ഷ്മ പരിശോധന, ഫോട്ടോ കോപ്പി എന്നിവയ്ക്ക് അപേക്ഷിക്കാനുള്ള അവസാന തീയതി മെയ് 14 ആണെന്നും മന്ത്രി വി ശിവന്കുട്ടി പറഞ്ഞു.
2023-24 വര്ഷത്തെ ഹയര് സെക്കണ്ടറി, വൊക്കേഷണല് ഹയര്സെക്കണ്ടറി പരീക്ഷാഫലങ്ങള് പ്രഖ്യാപിച്ചു. ഹയര് സെക്കണ്ടറി വിഭാഗത്തില് കഴിഞ്ഞ വര്ഷത്തെക്കാള് കുറവാണ് വിജയ ശതമാനം. ഇത്തവണ 78.69 ശതമാനമാണ് വിജയം. മുന് വര്ഷം 82.95 ശതമാനമായിരുന്നു. 4.26 ശതമാനത്തിന്റെ കുറവുണ്ട്. 2024 സ്കൂളില് നിന്ന് കേന്ദ്രങ്ങളില് 3,74755 പേര് പരീക്ഷയെഴുതി. ഇതില് 2,94888 പേര് പേര് ഉപരിപഠനത്തിന് യോഗ്യത നേടി.
സയന്സ് ഗ്രൂപ്പില് വിജയശതമാനം 84.84, കോമേഴ്സില് 76.11ഉം, ഹ്യുമാനിറ്റിസില് വിജയശതമാനം 67.09 ശതമാനവുമാണ്. എല്ലാവിഷയങ്ങളിലും എ പ്ലസ് നേടിയവര് 39242 പേരാണ്. കഴിഞ്ഞ വര്ഷം ഇത് 33815 ആയിരുന്നു. 5427 പേരുടെ വര്ധനയുണ്ട്. തിരുവനന്തപുരം പിആര്ഡി ചേംബറില് വിദ്യാഭ്യാസ മന്ത്രി വി ശിവന്കുട്ടിയാണ് ഫലം പ്രഖ്യാപിച്ചത്. പരീക്ഷയില് വിജയം നേടിയ എല്ലാ വിദ്യാര്ഥികളെയും വിദ്യാഭ്യാസമന്ത്രി അഭിനന്ദിച്ചു.
പരീക്ഷാ ഫലങ്ങള് www.prd.kerala.gov.in, www.keralaresults.nic.in, www.result.kerala.gov.in, www.examresults.kerala.gov.in, www.results.kite.kerala.gov.in എന്നീ വെബ്സൈറ്റുകളിലും PRD Live മൊബൈല് ആപ്പിലും ലഭ്യമാകും.പിആര്ഡി ലൈവ് ആപ്പിന്റെ ഹോം പേജിലെ ലിങ്കില് രജിസ്റ്റര് നമ്പര് മാത്രം നല്കിയാലുടന് വിശദമായ ഫലം ലഭിക്കും.
ക്ലൗഡ് സംവിധാനത്തിലൂടെ പോസ്റ്റ് ചെയ്തിരിക്കുന്ന ആപ്പില് തിരക്കുകൂടുന്നതിനനുസരിച്ച് ബാന്ഡ് വിഡ്ത്ത് വികസിക്കുന്ന ഓട്ടോ സ്കെയിലിങ് സംവിധാനമാണ് ഉപയോഗിച്ചിരിക്കുന്നത്. ഇന്ഫര്മേഷന് പബ്ലിക് റിലേഷന്സ് വകുപ്പിന്റെ ഔദ്യോഗിക മൊബൈല് ആപ്പായ PRD Live ഗൂഗിള് പ്ലേ സ്റ്റോറിലും ആപ്പ് സ്റ്റോറിലും ലഭ്യമാണ്.
